Trajneri i Manchester Cityt, Pep Guardiola ka mbetur i zhgënjyer me eliminimin nga Liga e Kampionëve.
“Citizens” i dhanë fund eksperiencës në këtë garë në çerekfinale pasi Real Madridi u tregua më i saktë nga gjuajtjet nga 11 metërshat, ndërsa të dyja përballjet përfunduan baras, shkruan “Gazeta Express”.
Në fund, trajneri spanjoll e përgëzoi kundërshtarin për mbrojtjen dhe shton se ekipit të tij i munguan disa detaje për ta fituar lojën.
“E uroj Real Madridin për kapacitetin për t’u mbrojtur dhe për të rezistuar deri në fund. Kanë bërë mjaft mirë dhe ne nuk e arritëm objektivin në detajet e fundit”, deklaroi fillimisht ish-trajneri i Barcelonës dhe i Bayern Munichut.
“Mendoj se tri ndeshjet që i kemi luajtur këtu, i kemi luajtur mjaft mirë. Në Bernabeu nuk kemi luajtur në të njëjtën mënyrë dhe si trajner vetëm mund ta kërkoj këtë nga lojtarët e mi: ta bëjmë këtë”, përfundoi Guardiola.
Manchester City shihej si favorit për ta fituar edhe këtë herë Ligën e Kampionëve, njëjtë siç bëri në edicionin e kaluar, por ishte Reali i cili i dha fund ëndrrës dhe shpresës së “Qytetarëve”.
Sidoqoftë, dy përballjes mes Realit dhe Cityt ishin spektakolare dhe u konsideruan si finale para finales. /Gazeta Express/