Ka përfunduar ekspertiza në shkollën “Albanian Qatar College” në Tiranë ku si pasojë e rrjedhjes së gazit u evakuuan të gjithë nxënësit ndërsa 6 prej tyre përfunduan në spital.
Bëhet me dije se sipas grupit hetimor shkolla ka 2 depozita të cilat shërbejnë në sistemin e ngrohjes. Njëra prej tyre ka pasur rrjedhje për shkak të tejmbushjes. Kjo depozitë ishte e pa certifikuar nga inspektorati shtetëror i enëve nën presion.
Depozita ishte e vendosur jashtë ambienteve të shkollës, por rrjedhja ka ndodhur në valvulën që lidh depozitën me pajisjen brenda shkollës.
Një prej vajzave tha për ABC se e kishin ndjerë erën e gazit që në orën e parë të mësimit por e kanë vijuar atë me dritare hapur pastaj kur gjendja është përkeqësuar iu është kërkuar të dalin jashtë për të pirë kafe.
Aktualisht po kryhet zbrazja e depozitës nga gazi. Për shkak të thithjes së gazit 6 nxënëse të moshave të ndryshme përfunduan në spital, fatmirësisht tani janë jashtë rrezikut për jetën.