Gianluigi Buffon njofton për dorëheqjen nga kombëtarja e Italisë, pasi s’u kualifikua në Botëror

Futboll

Gazeta Express

02/04/2026 17:04

Gianluigi Buffon ka konfirmuar se ka dhënë dorëheqje nga roli i tij si shef i delegacionit të kombëtares italiane, pas largimit të Gabriele Gravinas nga posti i presidentit të Federatës Italiane të Futbollit (FIGC).

Ndryshimet e mëdha kanë përfshirë strukturën e kombëtares së Italisë, pasi pas dorëheqjes së Gravinas, edhe Buffon ka vendosur të largohet, ndërsa trajneri Gennaro Gattuso pritet të ndjekë të njëjtin fat.

Këto largime vijnë pas humbjes dramatike me penallti ndaj Bosnje dhe Hercegovinës në finalen e “play-offit” të Kupës së Botës, që i kushtoi Italisë mungesën në Botëror për herën e tretë radhazi.

Buffon, përmes një deklarate të gjatë në Instagram, bëri të ditur se e kishte ofruar dorëheqjen menjëherë pas ndeshjes së së martës, por ishte kërkuar të priste para se ta bënte publike.

Tani, pas dorëheqjes zyrtare të Gravinas, ai ka vendosur ta konfirmojë vendimin e tij. Buffon kishte shërbyer si shef i delegacionit të kombëtares që nga vera e vitit 2023.

“Dorëheqja menjëherë pas ndeshjes kundër Bosnjës ishte një akt i domosdoshëm, që erdhi nga brenda meje. Po aq spontan sa lotët që më dhembin në zemër dhe që e di se i ndaj me të gjithë ju,” shkroi Buffon.

“M’u kërkua të prisja që të gjithë të kishin kohë për reflektim. Tani që presidenti Gravina ka vendosur të tërhiqet, ndihem i lirë të bëj atë që mendoj se është veprimi i duhur. Pavarësisht bindjes sime se kam ndërtuar shumë në aspektin e frymës së ekipit me Rino Gattuso dhe bashkëpunëtorët e mi në këtë kohë të shkurtër, objektivi kryesor ishte ta rikthenim Italinë në Kupën e Botës. Dhe nuk ia dolëm.

“Është e drejtë t’u lihet atyre që vijnë pas meje të zgjedhin personin më të përshtatshëm për këtë rol.

“Përfaqësimi i kombëtares ka qenë një nder dhe një pasion që më ka shoqëruar që nga fëmijëria.

“Jam përpjekur ta kryej detyrën time duke dhënë gjithçka, duke kërkuar lidhje dhe bashkëpunim mes të gjitha niveleve, nga ekipet e moshave deri te U21, për të ndërtuar një projekt që zhvillon talentet e së ardhmes për kombëtaren e parë.

“Kërkova dhe arrita përfshirjen e disa figurave me përvojë të madhe, me një vizion afatmesëm dhe afatgjatë. Besoj te meritokracia dhe do të jetë detyrë e drejtuesve të vlerësojnë këto zgjedhje.

“I mbaj të gjitha në zemër, me mirënjohje për privilegjin dhe mësimet e marra, edhe pse ky është një fund i dhimbshëm.

“Forza Azzurri gjithmonë”./GazetaExpress/