Risi të mëdha në VAR: Çfarë ndryshon në sezonin e ardhshëm në futbollin evropian?

Sport

Gazeta Express

29/04/2026 15:40

Sistemi i Video Assistant Referee (VAR) pritet të pësojë ndryshime të rëndësishme në sezonin e ardhshëm, me qëllim rritjen e shpejtësisë, transparencës dhe besueshmërisë në vendimmarrjet arbitrare.

Sipas raportimeve nga mediat ndërkombëtare, federatat dhe organet drejtuese të futbollit po e përgatitin një rishikim të thellë të mënyrës se si përdoret VAR, sidomos në kompeticionet elitare si ligat më të forta evropiane dhe Liga e Kampionëve, përcjell “Gazeta Express”.

Një nga ndryshimet kryesore është kufizimi i ndërhyrjeve të VAR-it vetëm në raste të “gabimeve të qarta dhe evidente”, me synimin për t’i shmangur ndërprerjet e gjata dhe diskutimet e pafundme në fushë.

Në disa kompeticione po shqyrtohet edhe përdorimi i inteligjencës artificiale për ta ndihmuar vlerësimin e vendimeve të gjyqtarëve dhe për ta përmirësuar përzgjedhjen e referëve që punojnë në dhomën VAR.

Një nga idetë më të diskutueshme është futja e sistemit të kërkesës për rishikim nga trajnerët, ku çdo skuadër mund të ketë disa “sfida” për ta kërkuar rishikimin e një situate të dyshimtë (penallti, gola, kartonë të kuq).

Ky model, i ngjashëm me atë të tenisit, tashmë po testohet në nivele më të ulëta dhe mund të vijë edhe në futbollin elitar.

Një tjetër risi e rëndësishme është përdorimi i teknologjisë plotësisht automatike për vendimet e “offside”, duke i reduktuar gabimet dhe kohën e pritjes gjatë kontrollit të aksioneve.

Organizatorët e garave synojnë që VAR-i të mos jetë më një sistem që “e ndalon lojën shpesh”, por një mjet që ndërhyn vetëm kur është e domosdoshme, duke e ruajtur ritmin e ndeshjeve.

Në disa projekte madje është diskutuar edhe vendosja e afateve kohore për rishikimet, për t’i shmangur vonesat e gjata që shpesh kanë shkaktuar edhe polemika. /Gazeta Express