Luis Enrique me fjalë të mëdha për Artetën, ja çka tha para finales së madhe të Championsit

Futboll

Gazeta Express

29/05/2026 22:29

Luis Enrique e lavdëroi Mikel Artetën dhe Arsenalin kampion të Premierligës përpara finales së Ligës së Kampionëve në Budapest të shtunën, duke insistuar se asnjëra skuadër nuk ka avantazh ndaj tjetrës.

Trajneri i Paris Saint-Germainit theksoi ngjashmëritë mes dy ekipeve dhe hodhi poshtë idenë se skuadra e tij ka nevojë për motivim shtesë.

Në fillim të konferencës për shtyp, Luis Enrique foli për ish-bashkëlojtarin e tij Arteta dhe suksesin e Arsenalit në Premierligë.

“Nuk jam i befasuar që ai i çoi drejt titullit. Ata e merituan ta fitojnë Premier League, sepse ishin të qëndrueshëm. Nuk ishte e lehtë me Manchester City pas tyre, por ata e merituan titullin. Në gjashtë vite e gjysmë, ai i njeh të gjitha detajet e Arsenalit,” tha Luis Enrique, duke krahasuar më pas stilet e dy finalistëve.

“Nuk janë dy ide të ndryshme,” tha ai kur u pyet për faktin se Arsenali ka mbrojtjen më të mirë në Ligën e Kampionëve, ndërsa PSG ka sulmin më produktiv.

“Ata janë gjithashtu një skuadër që shënon shumë gola dhe edhe ne mbrohemi mirë. Po shkojmë drejt të njëjtit destinacion, vetëm se po ndjekim rrugë të ndryshme”, shtoi ai.

PSG ka luajtur tri herë kundër Arsenalit në dy vitet e fundit, duke fituar dy përballjet më të fundit – brenda dhe jashtë fushe në gjysmëfinalet e sezonit të kaluar.

Megjithatë, francezët nuk po e marrin lehtë përgatitjen për finalen.

“Kemi kaluar kohë duke analizuar një kundërshtar që e njohim shumë mirë, sepse kemi luajtur disa herë kundër tyre. Gjithmonë ka gjëra që mund t’i përmirësosh dhe kjo është ajo që bëjmë në seancat tona. Menaxhimi i finales është gjithmonë ndryshe dhe duhet ta shfrytëzosh maksimalisht,” tha Luis Enrique.

“Finalja është gjithmonë një ndeshje e vështirë. Viti i kaluar ishte i jashtëzakonshëm, ne dominuam kundër Interit. Në finalen e nesërme, sinqerisht, nuk mendoj se ka favorit. Për ne, detajet bëjnë diferencën. Duhet të japim gjithçka për 90 minuta, por edhe t’i shijojmë ato 90 minuta”, shtoi ai.

Luis Enrique u pyet edhe për një video që u publikua nga festimet e titullit të Arsenalit, ku Arteta deklaronte krenarisht: “Ne do të jemi kampionë të Evropës të shtunën.”

Trajneri i PSG-së tha se skuadra e tij nuk ka nevojë për motivim shtesë nga deklarata të tilla.

“Nuk besoj se ka motivim më të madh sesa të fitosh Ligën e Kampionëve. Të tjerat janë vetëm strategji. Të dyja skuadrat kemi fituar kampionatet tona respektive, tani jam i fokusuar vetëm në atë që është më e mira për ekipin tonë në finale,” tha ai.

“Po përpiqemi të qëndrojmë të përqendruar te ajo që është e rëndësishme. Ne tashmë kemi hyrë në histori si një nga ekipet më të mira në botë dhe duam ta përsërisim këtë,” shtoi Enrique.

Këtë vit, Arsenali ka të njëjtin motivim që PSG kishte një vit më parë: ta fitojë për herë të parë në histori Ligën e Kampionëve.

“Po, fitimi për herë të parë është një motivim i madh, por mbrojtja e titullit është edhe më shumë,” tha Luis Enrique me buzëqeshje./GazetaExpress/