Lidhja e fortë mes mbipeshës, problemeve të frymëmarrjes dhe astmës

Keshilla Mjekësore

Gazeta Express

04/04/2024 20:48

Mjekët kanë paralajmëruar prej kohësh se mbipesha rrit rrezikun e shfaqjes së astmës.

Megjithatë, një kërkim i ri shkencor sugjeron se edhe azma mund të rrisë rrezikun e mbipeshës.

Studimet të cilave u referohet AgroWeb.org, kanë zbuluar se njerëzit e prekur nga astma janë më të rrezikuar nga mbipesha.

Rreziku është më i lartë tek njerëzit që preken nga azma në një moshë të rritur.

Sipas shkencëtarëve, mbipesha mund të luajë një rol nxitës për astmën nëpërmjet disa ndryshimeve fiziologjike, metabolike apo inflamatore.

Rekomandimet e shkencëtarëve mbi lidhjen mes mbipeshës dhe astmës

Shkencëtarët analizuan të dhënat e mbi 8,600 njerëzve nga 12 vende të ndryshme të botës.

Në fillim të studimit, asnjë prej pjesëmarrësve nuk ishte obez.

Në një periudhë disa vjeçare, shkencëtarët zbuluan se 10 për qind e njerëzve që vuanin nga azma, u bënë obezë 10 vjet pas nisjes së studimit.

Gjetjet e studimit sugjerojnë se marrëdhënia mes obezitetit dhe astmës është shumë herë më e komplikuar seç mendohej.

Këshilli Shkencor Evropian e përshkroi këtë studim si një hap të rëndësishëm në zbërthimin e marrëdhënies mes obezitetit dhe astmës.

Kjo do të çojë në gjetjen edhe të mjekimeve të duhura që lidhin mbipeshën dhe azmën.

Shkaktarët dhe nxitësit e tjerë të astmës

Studimet se çfarë e shkakton azmën janë ende në vijim.

Ajo që dihet deri më tani është se azma është një sëmundje inflamatore kronike që prek rrugët e frymëmarrjes.

Shkaqet dhe simptomat e azmës janë të ndryshme në varësi të individit.

Simptomat përfshijnë edhe kollë, vështirësi në frymëmarrje dhe një tingull me fishkëllimë gjatë marrjes së frymës.

Kolla që shoqëron azmën ndodh sepse trupi përpiqet të vet pastrohet nga sekrecionet./AgroWeb/