Luigi Pirandello (1867-1936), poet, prozator dhe dramaturg italian, konsiderohet një ndër kontribuesit më të mëdhenj të teatrit modern në botë. Në vitin 1934 fiton çmimin Nobel për Letërsi.
Drama e tij më e njohur është Gjashtë personazhe në kërkim të autorit, e shfaqur për herë të parë në vitin 1921. Ajo flet për gjashtë personazhe të cilët vijnë në teatër dhe kërkojnë që regjisori ta vërë në skenë historinë e jetës së tyre. E mbushur me humor dhe dëshpërim, kjo dramë, e sjellë në shqip nga përkthyesja dhe studiuesja Anxhela Lepuri, është një arritje e jashtëzakonshme teatrale që eksploron natyrën thelbësisht absurde dhe tragjike të gjendjes njerëzore.
Gjashtë personazhe në kërkim të autorit është dramë që ia ndërron kursin teatrit, duke ia vënë pasqyrën përballë. Ajo jepet si një ndërhyrje e papritur e jetës mes dy shfaqjeve dhe, njëkohësisht, si një intermezzo metateatrale. Gjashtë personazhe hyjnë në teatër dhe ngjiten në skenë, duke i ndërprerë provat e një shfaqjeje të Pirandello-s, dhe duke sjellë veten si material për një shfaqje tjetër. Kështu, kjo dramë, e shkruar si prishje e provës së një shfaqjeje dhe si nisje provash për një shfaqje tjetër, risjell në skenë diskutimin mbi funksionin e teatrit dhe mbi relacionin mes jetës dhe artit. Tollovia që shkaktohet në skenë nga karakteret që vijnë nga jeta, është tematizim i problematikës së teatrit. Prandaj kjo duhet lexuar, shikuar dhe vlerësuar si drama e dramës nga origjina deri në ditët e sotme. Ag APOLLONI
/Express