Shtatë zyrtarë të Agjencisë për Zhvillimin e Bujqësisë në kuadër të Ministrisë së Bujqësisë janë prangosur sot, në vazhdimësinë e aksionit “Subvencioni 2021”. Zyrtarët e arrestuar dyshohen për keqpërdorim të detyrës zyrtare dhe marrje ryshfeti në ndarjen e subvencioneve.
Burime të Gazetës Express thanë se pritet arrestimi edhe i personave të tjerë, në komuna të ndryshme të vendit. Gjatë ditës pritet arrestimi i së paku 15 personave.
Aksioni është udhëhequr nga Drejtoria për Hetimin e Krimeve Ekonomike në Policinë e Kosovës, bashkë me Prokurorinë Themelore të Prishtinës.
Momenti kur policia zbarkoi para Ministrisë së Bujqësisë.
Gazeta Express ka përcjellur aksionin nga afër, në videon më poshtë mund të shihni momentin e arrestimit të shtatë zyrtarëve të arrestuar.
“Subvencioni 2021” ka nisur në shkurt të këtij viti, teksa në ditën e parë të aksionit ishin prangosur 12 persona, shumica nga ta zyrtarë të ministrisë së Bujqësisë. Po atë ditë nga bastisjet e zhvilluara ishin konfiskuar mbi 400 e 30 mijë euro, 600 dollar, 200 franga, 275 lira turke, 15 telefona, 8 vetura, 1 kompjuter, 5 armë, 1 USB dhe 1 vulë.
Aksioni në fjalë ka vazhduar edhe ditëve të tjera, në një rast ishte arrestuar një zyrtar komunal i Pejës, i dyshuar për përfitimin e 48 mijë eurove në mënyrë të kundërligjshme. Më pas ishte arrestuar edhe një zyrtar komunal i Gjilanit, etj.
Të arrestuarve gjykata ua ka caktuar masën e paraburgimit. /Gazeta Express/