Greenwoodi e ‘refuzon’ Romën, kalon te Fenerbahçe

Futboll

Gazeta Express

08/07/2026 22:20

Aventurës se Mason Greenwoodit në Ligue 1 duket se po i vjen fundi, pasi një transferim befasues te Fenerbahçe po afrohet gjithnjë e më shumë.

Sulmuesi anglez, i cili iu bashkua Marseilles në vitin 2024, është në qendër të negociatave intensive që mund ta çojnë në Stamboll, te gjiganti turk.

Sipas “RMC Sport”, Fenerbahçe është shumë pranë arritjes së një marrëveshjeje për Greenwoodin, ndërsa bisedimet me Marseillen kanë avancuar ndjeshëm që nga përfundimi i sezonit 2024/25, kur nisën spekulimet për largimin e tij.

Edhe pse Atletico Madridi u përpoq ta bindte ish-sulmuesin e Manchester Unitedit me një projekt sportiv ambicioz, oferta financiare e Fenerbahçes rezultoi vendimtare.

Greenwoodi pritet të nënshkruajë një kontratë katërvjeçare me klubin turk, ku do të përfitojë një pagë neto prej 10 milionë eurosh në sezon.

Kur Greenwoodi u largua nga Manchester Unitedi për te Marseille në verën e vitit 2024, në marrëveshje ishte përfshirë një klauzolë që i garantonte klubit anglez një përqindje nga çdo transferim i ardhshëm.

Për këtë arsye, Fenerbahçe ndoqi një strategji të veçantë në negociata, duke zhvilluar bisedime të ndara me Marseillen dhe Manchester Unitedin për të zgjidhur pjesën financiare që i takonte secilit klub.

Marrëveshja për transferimin e sulmuesit anglez vlerësohet në 42 milionë euro, përfshirë bonuset, shumë që mbulon edhe përqindjen që i takon Manchester Unitedit.

Në kundërshtim me raportimet e fundit se Marseille zotëronte 60 për qind të kartonit të lojtarit, struktura e re e marrëveshjes do t’i sigurojë klubit francez rreth 30 milionë euro neto pas përfundimit të operacionit.

Pavarësisht talentit të padiskutueshëm të Greenwoodit në fushë, drejtuesit e Marseille e konsideruan largimin e tij si një domosdoshmëri financiare, pasi paga e lartë e sulmuesit rëndonte ndjeshëm buxhetin e klubit.

Pasi u arrit marrëveshja financiare me Fenerbahçen, Marseille përfshiu edhe Manchester Unitedin në negociata për të finalizuar ndarjen e të ardhurave dhe për të përmbyllur transferimin.

Sipas raportimeve, pakënaqësia në rritje me sjelljen dhe përkushtimin e Greenwoodit gjatë sezonit bindi drejtuesit e klubit ta lejonin largimin e tij, pavarësisht potencialit të madh që zotëron.

I gjithë operacioni është drejtuar nga drejtori i ri sportiv i Marseille, Gregory Lorenzi, i cili e sheh largimin e Greenwoodit si një hap të rëndësishëm në projektin e tij për rindërtimin e skuadrës./GazetaExpress/