David shkëlqen, Kanadaja turpëron Katarin me gjashtë gola

Sport

Gazeta Express

19/06/2026 8:22

Kanadaja ka arritur fitoren e parë në historinë e saj në një Kampionat Botëror, duke mposhtur Katarin me rezultat bindës 6-0. Heroi i ndeshjes ishte sulmuesi Jonathan David, i cili realizoi tre gola dhe udhëhoqi ekipin e Jesse Marsch drejt një triumfi të paharrueshëm.

Kanadezët dominuan plotësisht që nga minuta e parë, duke ushtruar presion të vazhdueshëm ndaj skuadrës së drejtuar nga Julen Lopetegui. Goli i parë erdhi në minutën e 15-të, kur portieri Mahmoud Abunada ndali me vështirësi një goditje të Davidit, por topi përfundoi te Cyle Larin, i cili shënoi pa problem për 1-0.

Pak minuta më vonë, Jonathan David dyfishoi epërsinë me një volej të fuqishëm nga distanca. Situata u përkeqësua edhe më shumë për Katarin në minutën e 30-të, kur Homam Al Amin u ndëshkua me karton të kuq pasi ndërhyri ndaj Tajon Buchanan si lojtari i fundit. Në fundin e pjesës së parë, David realizoi golin e tij të dytë personal për ta dërguar Kanadanë në pushim me avantazh 3-0.

Pas rikthimit në fushë, Katari mbeti me vetëm nëntë lojtarë. Assim Madibo u përjashtua me karton të kuq pas një ndërhyrjeje të rëndë ndaj Ismaël Koné, i cili u largua me barelë dhe dyshohet për thyerje të këmbës.

Megjithatë, Kanadaja vazhdoi dominimin. Zëvendësuesi Nathan Saliba shënoi një supergol nga goditja e lirë për 4-0, ndërsa më pas Mohammad Al Mannai devijoi topin në portën e tij pas një aksioni të Jacob Shaffelburg për rezultatin 5-0.

Në minutat shtesë, Jonathan David vulosi paraqitjen e jashtëzakonshme duke kompletuar “hat-trick”-un dhe duke vendosur shifrat përfundimtare 6-0.

Me këtë fitore historike, Kanadaja jo vetëm që siguroi tri pikë të rëndësishme, por dërgoi edhe një mesazh të fortë për rivalët në Botëror. /GazetaExpress/