Albin Kurti kujton Fehmi Lladrovcin me një histori të 28 nëntorit 1997

Gazeta Express

22/09/2020 15:01

Kreu i LVV’së, Albin Kurti e ka kujtuar sot Fehmi Lladrovcin, duke tregur një histori të vitit 1997, raporton Gazeta Express.

Kurti në Facebook ka thënë se 28 nëntorin 1997 e kishte kremtuar bashkë me Lladrovcin në München të Gjermanisë.

“Mandej udhëtuam për Düsseldorf ku qëndruam një natë, para se të vazhdonim për Amsterdam prej nga fluturuam për ShBA.  Fehmi Lladrovci ishte siç ma kishte përshkruar Adem Demaçi: porsi prushi (“zharavë”, nofkë kjo e Bacës Adem për të nga koha e burgut në Stara Gradishkë të Kroacisë). Përveçse i burgosur politik, Fehmi Lladrovci ishte inxhinier i makinerisë nga Universiteti i Zagrebit. Nëse luftëtari i UÇK-së është sa çereku i Fehmi Lladrovcit, s’ka gjë që na ndal, mendova me vete”, ka shkruar ai.

“Shoqata “Shqiponja”, e udhëhequr nga Lulzim Dragidella e pat organizuar atëbotë festën e 28 nëntorit 1997 në Gjermani, ku morëm pjesë bashkë me Bujar Dugollin, e ku takova Fehmi Lladrovcin e Rexhë Ibërdemajn. 

Mbresa të pashlyeshme sot teksa bëmë homazhe te përmendorja e Fehmi dhe Xhevë Lladrovcit që para 22 viteve ranë heronj bashkë me ushtaren Fatime Hetemi”, ka shkruar Kurti./GazetaExpress/