Yamal qetëson tifozët pas zëvendësimit

Futboll

Gazeta Express

22/06/2026 12:19

Ylli i Spanjës, Lamine Yamal, ka qetësuar tifozët pas zëvendësimit të tij në pushimin mes pjesëve në fitoren bindëse 4-0 ndaj Arabisë Saudite në Kupën e Botës.

18-vjeçari ishte një nga lojtarët më të mirë në fushë gjatë pjesës së parë dhe shënoi golin e parë të ndeshjes, duke ndihmuar Spanjën të rikthehej fuqishëm pas barazimit zhgënjyes 0-0 ndaj Cape Verdes në sfidën hapëse.

Megjithatë, largimi i tij në fund të 45 minutave të para ngriti dyshime për një rikthim të mundshëm të dëmtimit në muskulin e kofshës, nga i cili ishte rikuperuar së fundmi. Yamal, megjithatë, sqaroi se gjithçka ishte planifikuar paraprakisht.

“Ishte pjesë e planit. Duhej të luaja vetëm një pjesë për të pushuar dhe, mbi të gjitha, për ta ndihmuar ekipin. Gjithçka shkoi sipas parashikimit”, deklaroi ai.

Me Spanjën që po udhëhiqte 3-0 në fund të pjesës së parë, trajneri Luis de la Fuente vendosi të mos rrezikonte dhe ta ruante Yamalin për ndeshjen e fundit të grupit kundër Uruguait.

Përveç fitores, talenti i Barcelonës arriti edhe një moment të veçantë personal, pasi shënoi në ndeshjen e tij të parë si titullar në një Kupë Bote.

“Ishte shumë speciale. Gjithmonë kam ëndërruar të luaj në Kupën e Botës dhe të shënoj në ndeshjen time të parë si titullar është një ëndërr e bërë realitet. Botërorin e fundit e ndiqja nga klasa, ndërsa tani po shënoj me familjen time në tribunë”, tha ai.

Me golin ndaj Arabisë Saudite, Yamal u bë një nga dhjetë golashënuesit më të rinj në historinë e Kupës së Botës. Ai renditet përpara Lionel Messi në këtë listë, ndërsa rekordi vazhdon të mbahet nga Pelé.

Duke folur për reagimin e Spanjës pas ndeshjes së parë, Yamal theksoi se barazimi ndaj Cape Verdes i kishte bërë lojtarët të reflektonin.

“Ndeshja e parë nuk ishim ne. Ai rezultat na dhembi dhe na bëri të mendojmë shumë. Në këtë ndeshje treguam se kush jemi dhe duam edhe më shumë”, përfundoi sulmuesi spanjoll. /GazetaExpress/