Vaksinohet 111-vjeçarja në Shkodër, mposhti dy luftëra dhe dy pandemi botërore

Shqiperi

Gazeta Express

04/03/2021 13:30

Zenepe Pirani nga Podgorica me banim ne Shkodër, është 111-vjeçarja qytetarja më e vjetër në moshë që ka marrë dozën e parë të vaksinës Pfizer.

Kjo grua e cila ka kaluar dy luftëra botërore dhe tashme dy pandemi botërore, asgjë nuk e ka mposhtur. Edhe pse pëshpërit e kuptojmë kur tregon me gjeste moshën dhe pak nga historia e saj e rrallë.

Vaksinuesit e gjetën në banesën e saj modeste në lagjen Tophane, ku jeton fillikat dhe i lutet Zotit të largojë pandeminë.

Përveç vaksinës, Zenepja ka marrë gjatë jetës së saj me shume se shekullore vetëm aspirinë, ndërsa për krizat e veshkave thotë se ka pirë vajguri.

Gjithmonë ka dashur të arsimohej, madje emocionohet kur e pyesim për shkollën dhe nuk mban dot lotët.

111-vjeçarja shpreh dëshirën te votoje madje te takoje edhe Kryeministrin Rama. Është madje qytetare model, me pensionin modest paguan faturat e energjisë dhe ujin.

Pengu me i madh që ka në zemer është se nuk lindi kurrë fëmijë, bashkëshorti iu nda nga jeta 20 vite me pare, sot te afërmit përtej kufirit paguajnë nje kujdestare per te.

111-vjeçarja erdhi nga Mali i Zi në Shkodër 97 vite më parë bashkë me 4 motrat e tjera dhe prindërit. Në moshë farë të re, 16 vjeçe u fejua dhe mbeti në Shqipëri, ndërsa pas luftës familja e saj u rikthye në Malin e Zi.