SHBA-ja planifikon t’i shpenzojë 369 miliardë dollarë për luftimin e ndryshimeve klimatike

Lajme

Gazeta Express

08/08/2022 13:01

Senati i SHBA-ve ka miratuar një projekt-ligj që përfshin 369 miliardë dollarë (305 miliardë £) për veprimin ndaj klimës – investimi më i madh në historinë e Amerikës.

Autorët e Aktit për Reduktimin e Inflacionit thonë se do të ulë emetimet e karbonit në vend me 40% deri në vitin 2030.

Disa familje mund të marrin deri në 7,500 dollarë kreditim tatimor për të blerë një makinë elektrike dhe 4,000 dollarë për një makinë të përdorur.

Projektligji – një plan kyç i agjendës së Presidentit Joe Biden – tani do të dërgohet në Dhomën e Përfaqësuesve të kontrolluar nga demokratët.

Pritet të mbështetet atje brenda kësaj jave, përpara se të nënshkruhet në ligj nga zoti Biden, raporton BBC, transmeton Express.

Me zgjedhjet afatmesme në SHBA vetëm tre muaj larg, miratimi i projektligjit do të shihet si një nxitje për demokratët, thotë korrespondenti i BBC-së për Amerikën e Veriut, Peter Bowes.

Shtetet e Bashkuara janë goditur nga përmbytjet vdekjeprurëse dhe zjarret në vitet e fundit.

Ndryshimi i klimës rrit rrezikun e motit të nxehtë dhe të thatë që ka të ngjarë të nxisë zjarret.

Bota tashmë është ngrohur me rreth 1.1C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.