Ronaldo: Messi është më i miri

Futboll

Gazeta Express

18/06/2026 10:59

Legjenda braziliane Ronaldo ka deklaruar se debati për lojtarin më të mirë të të gjitha kohërave duhet të marrë fund, duke e cilësuar Lionel Messi si futbollistin më të madh në histori pas paraqitjes së tij spektakolare ndaj Algjerisë në Botërorin 2026.

Messi udhëhoqi Argjentinën drejt një fitoreje të pastër 3-0 në ndeshjen hapëse të turneut, duke realizuar një “hat-trick” dhe duke nisur në mënyrë perfekte mbrojtjen e titullit botëror.

Paraqitja e tij bëri që Ronaldo brazilian të shpërthente me lëvdata.

“Ka ardhur koha që bota të ndalojë së fshehuri dhe të pranojë faktin se ai është lojtari më i mirë i të gjitha kohërave. Ai vazhdon të shkëlqejë çdo sezon dhe në çdo Botëror, por ende ka njerëz që dyshojnë tek ai. Ishte një natë historike që do të mbetet përgjithmonë në librat e futbollit”, deklaroi Ronaldo për mediumin portugez A Bola.

Me tre golat ndaj Algjerisë, Messi arriti në kuotën e 16 golave në Kupat e Botës, duke barazuar rekordin historik të Miroslav Klose si golashënuesi më i mirë në historinë e turneut. Po ashtu, ishte “hat-trick”-u i tij i parë në një Botëror.

Ronaldo brazilian shtoi se nuk është i befasuar nga arritjet e argjentinasit. “Rekordet janë bërë për t’u thyer dhe personi që i thyen ato nuk habit askënd në botën e futbollit. Për më tepër, Argjentina është kampionia në fuqi”, tha ai.

Ndërkohë, mbrëmja ishte krejtësisht ndryshe për rivalin e vjetër të Messit, Cristiano Ronaldo. Sulmuesi portugez nuk arriti të lërë gjurmë në barazimin 1-1 të Portugalisë ndaj RD Kongos, duke zgjatur serinë e ndeshjeve pa gol në turnetë e mëdhenj ndërkombëtarë.

Pas fitores bindëse ndaj Algjerisë, Argjentina tani do të përqendrohet te ndeshja e radhës kundër Austrisë, ndërsa Portugalia e Cristiano Ronaldos do të kërkojë fitoren e parë ndaj Uzbekistanit për të bërë një hap të madh drejt fazës me eliminim direkt. /GazetaExpress/