Rodri i nënshtrohet operacionit në shpinë, reagon Man City

Sport

Gazeta Express

28/07/2026 14:45

Manchester City ka konfirmuar se mesfushori spanjoll Rodri i është nënshtruar me sukses një ndërhyrjeje të vogël kirurgjikale në shpinë.

Klubi anglez njoftoi se fituesi i Topit të Artë kishte ndier shqetësime prej disa kohësh, ndaj u vendos që t’i nënshtrohej operacionit për ta zgjidhur problemin, përcjell “Gazeta Express”.

Ndërhyrja ka rezultuar e suksesshme dhe lojtari tashmë do ta nisë një periudhë të shkurtër rehabilitimi.

Në deklaratën zyrtare, Manchester City nuk bëri të ditur se sa kohë do të mungojë 30-vjeçari, por theksoi se do të publikojë përditësime mbi ecurinë e rikuperimit të tij në javët në vazhdim.

Rodri vjen pas një vere të jashtëzakonshme, ku e udhëhoqi Spanjën drejt triumfit në Kupën e Botës 2026 dhe u shpall lojtari më i mirë i turneut.

Megjithatë, problemi në shpinë kërkoi ndërhyrje kirurgjikale përpara fillimit të sezonit të ri.

Sipas raportimeve në Angli, ekziston mundësia që mesfushori t’i humbasë ndeshjet e para të sezonit të ri në Premierligë, megjithëse klubi ende nuk e ka vendosur një afat zyrtar për rikthimin e tij.

Ndërkohë, Real Madridi po punon për transferimin e tij në Spanjë gjatë kësaj vere, ndërsa interesim për të ka shfaqur edhe Paris Saint-Germaini.

Rodri njëherësh shihet si favorit për ta fituar edhe Topin e Artë të këtij viti. /Gazeta Express