Presidenca: Alibi e neveritshme! KED nuk bllokohet në rast largimi të Dvoranit

Gazeta Express

12/12/2019 12:11

Zëdhënësi i Presidencës Tedi Blushi ka reaguar sërish këtë të enjte në lidhje me deklarimet e bëra ditën e djeshme nga kryetari i Këshillit të Emërimeve në Drejtësi, i paditur nga Presidenti Ilir Meta për shpërdorim detyre dhe përvetësim të titullit.

Blushi shkruan se deklarimet e Dvoranit mbi funksionalitetin e KED-së, janë të gënjeshtërta për arsyen se nëse ai ndiqet penalisht nga prokuroria, Këshilli i Emërimeve në Drejtësi funksionon normalisht edhe pa prezencën e tij si kryetar, pasi sipas ligjit është zv.kryetari ai që i ushtron të gjitha funksionet e kryetarit, kur ky i fundit është në mungesë apo në pamundësi të ushtrimit të detyrës.

REAGIMI I PLOTË I PRESIDENCËS:

I pyetur nga gazetarët në lidhje me pretendimin e Ardian Dvoranit se, nëse ai do të merrej i pandehur nga Prokuroria, atëherë kjo do të sillte bllokimin e funksionimit të KED-së, Zëdhënësi i Presidentit të Republikës, zoti Tedi Blushi sqaroi se:

Kjo është një alibi e neveritshme për t’i shpëtuar drejtësisë për veprat penale që Ardian Dvorani ka konsumuar dhe për të cilat është kallëzuar penalisht në Prokurori.

Ligji nr. 115/2016, për funksionimin e Këshillit të Emërimeve në Drejtësi e ka zgjidhur shumë mirë këtë situatë në nenin 227 të tij, ku parashikon se “Anëtari më i vjetër në moshë nga Gjykata Kushtetuese është Zëvendëskryetari i KED-së. Zëvendëskryetari ushtron të gjitha funksionet e Kryetarit në mungesë ose pamundësi të këtij të fundit”.

Nuk është përgjegjësia penale e Ardian Dvoranit, që mund të bllokojë funksionimin normal të KED, por u bllokua qëllimisht funksionimi i KED për dy vite radhazi, që në krye të këtij organi të vihej Ardian Dvorani, për të konsumuar të tilla shkelje të rënda kushtetuese dhe ligjore.

Edhe mbledhja e djeshme e KED-së, e zhvilluar duke njoftuar dy Rende Dite të ndryshme, një të njoftuar publikisht dhe një të ndryshëm të njoftuar anëtarëve dhe pjesëmarrësve në Këshill, është një tjetër e dhënë e papërgjeshmërisë së këtij individi , përkundrejt zbatimit të transparencës së ushtrimit të detyrës ashtu siç kushtetuta dhe ligji ia kërkon.