Premier League publikon kalendarin e ri

Futboll

Gazeta Express

19/06/2026 12:39

Kalendarit i sezonit 2026/27 në Premier League është publikuar zyrtarisht, duke zbuluar ndeshjet e javës hapëse, derbit më të mëdha të sezonit dhe përballjet e fundit që mund të vendosin titullin, Evropën dhe mbijetesën.

Pas triumfit historik sezonin e kaluar, Arsenal do të nisë mbrojtjen e titullit, ndërsa rivalët si Manchester City, Liverpool dhe Manchester United synojnë rikthimin në fron.

Ndeshjet e javës së parë

Sezoni i ri pritet të nisë me disa përballje shumë interesante.

Arsenali do ta fillojë rrugëtimin drejt mbrojtjes së titullit në shtëpi ndaj Coventry City, skuadër që rikthehet në elitë pas 25 vitesh mungesë.

Një tjetër i sapongjitur, Hull City, do të presë Manchester United në një test të vështirë që në start.

Ndërkohë, një nga sfidat më tërheqëse të javës hapëse do të jetë udhëtimi i Liverpoolit në fushën e Newcastle United në “St James’ Park”.

Derbit që do të ndezin sezonin

Si çdo vit, derbit tradicionale pritet të jenë ndër ndeshjet më të ndjekura të kampionatit.

Rivaliteti i Londrës Perëndimore mes Chelsea dhe Fulham do të hapë serinë e derbeve të mëdha.

Në shtator, Manchester United do të përballet me Manchester City në derbin e qytetit, ndërsa në nëntor Liverpool do të luajë në fushën e rivalit të tij lokal.

Dhjetori do të sjellë dy superderbi në të njëjtën fundjavë: Newcastle United kundër Sunderland dhe derbin e zjarrtë të Londrës Veriore mes Tottenham Hotspur dhe Arsenal.

Dita e fundit mund të vendosë gjithçka

Tradicionalisht, Premier League rrallëherë mbyllet pa dramë në javën e fundit dhe sezoni 2026/27 pritet të mos jetë ndryshe.

Coventry, Hull City dhe Ipswich Town do t’i zhvillojnë ndeshjet e fundit në shtëpi, ndërsa Arsenal, Manchester United, Liverpool dhe Chelsea mund të kenë mundësinë të festojnë para tifozëve të tyre nëse gara për titull mbetet e hapur deri në fund.

Kush është favoriti për titullin?

Arsenali i drejtuar nga Mikel Arteta i dha fund pritjes 22-vjeçare për titull sezonin e kaluar dhe synon ta mbrojë kurorën.

Te Manchester City ka nisur një epokë e re pas largimit të Pep Guardiola. Pasardhësi i tij, Enzo Maresca, do të përballet me presionin e madh për të vazhduar sukseset e klubit.

Në “Old Trafford”, Michael Carrick ka fituar besimin e drejtuesve pas rikthimit të Manchester United në Ligën e Kampionëve dhe synon titullin e parë kampion që nga largimi i legjendarit Alex Ferguson në vitin 2013.

Liverpooli, pas një sezoni zhgënjyes që solli largimin e Arne Slot, i ka besuar projektin e ri Andoni Iraola, i cili synon ta rikthejë klubin në garën për kreun.

Ndërkohë, Chelsea me Xabi Alonso në stol dhe pa angazhime evropiane mund të jetë një rival shumë serioz, ndërsa Aston Villa kërkon të ndërtojë mbi suksesin e fitimit të Ligës së Evropës.

Nga ana tjetër, Tottenham duhet të dëshmojë se vazhdon të jetë pjesë e elitës së futbollit anglez, ndërsa Frank Lampard përballet me sfidën e madhe për ta mbajtur Coventryn në Premier League pas rikthimit historik. /GazetaExpress/