Policia e Tiranës: 31-vjeçari që grushtoi Berishën ka precedent penal, vuan nga çrregullime psikotike

Shqiperi

Gazeta Express

06/12/2022 14:59

Policia e Tiranës përmes një deklarate për shtyp bën me dije se 31 vjeçari Gert Shehu që grushtoi kreun e PD Sali Berisha në protestën e opozitës në Tiranë është me precedentë penalë dhe vuan nga çrregullime psikotike,

“Në lidhje me incidentin e ndodhur në orën 12:25, në tubimin e organizuar ditën e sotme, gjatë të cilit shtetasi G. Sh. goditi me grusht, deputetin S. Berisha, ju bëjmë me dije se: Specialistët për Hetimin e Krimeve të DVP Tiranë po kryejnë veprimet procedurale për shtetasin G. Sh., 31 vjeç, banues në Tiranë, për veprën penale “Goditje për shkak të detyrës”.

Nga verifikimet paraprake rezulton se 31-vjeçari ka precedentë të mëparshëm kriminal, për plagosje, prishje të qetësisë publike dhe në fushën e narkotikëve. Gjithashtu, sipas diagnozës klinike, të vënë në dispozicion nga familjarët e tij, 31-vjeçari vuan nga çrregullime psikotike dhe trajtohej prej vitesh, për këtë“, njofton policia.

Teksa kanë qenë duke ecur drejt bulevardit “Dëshmorët e Kombit” së bashku me Ilir Metën, Berisha u godit nga Gert Shehu 31vjeç. Shehu u dërgua në selinë e PD-së pasi u godit nga simpatizantët demokratë dhe u neutralizua nga truprojat. Më pas, në selinë e PD shkoi policia dhe ambulanca, duke e transportuar drejt Traumës.

/Gazeta Express