Paralajmërim për produktet intime me aromë në gjenitale femrore

Keshilla Mjekësore

Gazeta Express

27/04/2026 19:41

Ekspertët e shëndetit kanë ngritur shqetësime për një kategori të re produktesh intime për femra, të njohura si “vaginal melts”, të cilat pretendojnë të përmirësojnë aromën natyrale të zonës intime.

Këto produkte, të ngjashme me supozitorët dhe shpesh të përbëra nga vaj kokosi me aroma frutash, promovohen si pjesë e rutinës së kujdesit personal. Megjithatë, specialistët paralajmërojnë se përdorimi i tyre mund të ketë pasoja për shëndetin.

Sipas mjekëve, futja e produkteve të tilla në vaginë mund të prishë balancën natyrale të baktereve mbrojtëse – të njohur si mikrobioma vaginale – duke rritur rrezikun për infeksione dhe irritime. Ulja e baktereve të dobishme mund të çojë në rritje të pH-së dhe zhvillimin e mikroorganizmave të dëmshëm.

Dr Ginni Mansberg thekson se produkte të aromatizuara, vajra apo konservues të përdorur në këtë zonë mund të shkaktojnë reaksione alergjike dhe përkeqësim të gjendjeve ekzistuese, si infeksionet bakteriale apo mykotike.

Udhëzimet e NHS këshillojnë shmangien e produkteve të brendshme për higjienë rutinë, duke rekomanduar pastrimin vetëm të pjesës së jashtme me ujë ose produkte pa aromë. Ekspertët theksojnë se vagina është organ vetëpastrues dhe nuk ka nevojë për produkte të tilla.

Po ashtu, vihet në dukje se aroma natyrale e trupit ndryshon gjatë ciklit menstrual dhe nuk duhet konsideruar problem që kërkon “maskim”.

Një tjetër shqetësim lidhet me ndikimin në kontracepsion. Produktet me bazë vajore mund të dëmtojnë prezervativët prej lateksi, duke rritur rrezikun e çarjes dhe shtatzënive të padëshiruara. Për këtë arsye, rekomandohen alternativa me bazë uji.

Mjekët paralajmërojnë gjithashtu se simptoma si sekrecione të pazakonta, erë e fortë, kruarje apo dhimbje nuk duhen mbuluar me produkte kozmetike, por duhet të kontrollohen nga specialistët, pasi mund të sinjalizojnë infeksione si kandidiaza apo çrregullime bakteriale.

Sipas ekspertëve, rritja e këtyre produkteve në treg reflekton një tendencë më të gjerë për të paraqitur funksionet natyrale të trupit si probleme që kërkojnë zgjidhje, duke krijuar shpesh pasiguri të panevojshme tek gratë. /GazetaExpress/