Kryetari i Partisë Demokratike Sali Berisha ka folur për mediat në mjediset e Kuvendit lidhur me protestën që pritet të nisë pak orë më vonë.
Ai tha se si çdo protestë edhe kjo e sotmja ka skenarin e saj. “Kundër politikës së çpopullimit të Shqipërisë, kundër manipulimit të votës dhe sistemeve elektorale, protestojnë fuqishëm mbarë shqiptarët.
Dua të shpreh mirënjohjen dhe ftesën time për qytetarët e Tiranës dhe mbarë Shqipërisë të bashkohemi në orën 7 para kryeministrisë për të shprehur me protestën tonë vendimin e shqiptarëve për shpëtimin e Shqipërisë nga regjimi i kleptokratik i Edi Ramës”, u shpreh Berisha.
Jashtë parlamentit Berisha theksoi se protesta e sotme është inaugurimi i procesit të largimit nga pushteti i Kryeministrit Rama.
Sipas tij, protestat nuk do të ndalen deri sa të arrijnë këtë qëllim.
Cili është skenari i protestës?
Berisha: Protesta ka skenarin e vet. E rëndësishme është që ne të japim mesazhin tonë të fuqishëm se shqiptarët nuk do ta tolerojnë më këtë regjim.
Do vijojnë protestat?
Berisha: Kjo është protesta që inauguron procesin e largimit të Edi Ramës nga pushteti. Protestat ndalen vetëm atëherë kur realizojnë qëllimin e tyre madhor.
/Express