Nëna e Greta Thunberg-ut tregon për fëmijërinë e trazuar të vajzës

Gazeta Express

23/02/2020 9:54

Malena Ernman, nëna e aktivistes së famshme suedeze, Greta Thunberg, ka dhënë hollësi për fëmijërinë me probleme të vajzës dhe transformimin e jashtëzakonshëm nga një fëmijë i heshtur në zërin më të fuqishëm në botë kundër ndryshimeve klimatike.

Gjatë një rrëfimi të përcjellë me emocione, zonja Ernman përshkruan se si Greta u diagnostifikua me autizëm dhe si aktivizmi i ndihmoi që ta tejkalonte një çrregullim të ngrënies.

Rrëfimin për problemet e vajzës së saj ajo e paraqet në librin “Shtëpia jonë është në zjarr: Skena të një familjeje dhe të një planeti në krizë”, në të cilin ka kontribuar me shkrime e tërë familja Thunberg.

“Ajo po zhdukej ngadalë në një lloj errësire. Nuk i binte më pianos, nuk qeshte, nuk fliste dhe nuk hante”, tregon nëna e aktivistes adoleshente.

Malena, këngëtare e njohur e operës në Suedi, dhe bashkëshorti Svante Thunberg, aktor, e kishin vështirë të përballen me heshtjen dhe refuzimin e ushqimit nga vajza e tyre, shkruan “The Guardian”, transmeton Gazeta Express.

Greta i kishte humbur 10 kilogramë brenda dy muajve dhe ishte pranë shtrirjes në spital. Babai i saj më pas e kuptoi se vajza po ngacmohej në shkollë. “Mënyra se si shkolla e kupton situatën është e ndryshme. Shkolla mendon se është faji i Gretës”, thotë nëna e saj.

Në verën e vitit 2018, Greta e filloi protestën e parë në shkollë duke qëndruar para zyrës së kryeministrit suedez. Babai ishte përpjekur ta bindte që të shkonte në shtëpi, por ajo kishte refuzuar.