Kushtet atmosferike e pamundësojnë nisjen e raketës së NASA’s dhe SpaceX

Gazeta Express

27/05/2020 23:20

Lëshimi historik i një rakete të NASA-s dhe kompanisë private SpaceX është shtyrë për shkak të kushteve të motit.

Lëshimi i saj mund të ndodhë më 30 maj.

Nisja e raketës drejt Stacionit Ndërkombëtar të Hapësirës ishte paraparë të ndodhë të mërkurën në mbrëmje, por fluturimi u vendos të shtyhet, për shkak se në momentet e fundit moti ishte me stuhi dhe vetëtima.

Ky do të ishte fluturimi i parë pas nëntë vitesh i NASA-s në hapësirë.

Presidenti amerikan, Donald Trump dhe nënpresidenti Mike Pence shkuan në bazën në Florida, për të parë nisjen.

Brenda raketës ishin dy astronautë të NASA-s, koloneli i Marinsave në pension Doug Hurley dhe kolonelit të Forcave Ajrore, Bob Behnken.

Behnken dhe Hurley kanë qenë në karantinë në dy javët e fundit, si një masë kundër koronavirusit.

Raketa e kompanisë private SpaceX, në pronësi të miliarderit Elon Musk, pritej të lëshohej nga Qendra e Hapësirës Kennedy në Florida.

SpaceX po bëhet kompania e parë private që dërgon njerëz në hapësirë.

Nëse fluturimi do të jetë i suksesshëm, ai do të shënojë një moment thelbësor në eksplorimin e hapësirës me operimin e parë të një kompanie private, në një fushë, që për shtatë dekada ka simbolizuar fuqinë e një numri të vogël shtetesh.

Presidenti amerikan Trump është duke u përpjekur të riafirmojë sundimin amerikan të hapësirës dhe ka urdhëruar një rikthim në Hënë në vitin 2024.

Standing down from launch today due to unfavorable weather in the flight path. Our next launch opportunity is Saturday, May 30 at 3:22 p.m. EDT, or 19:22 UTC

— SpaceX (@SpaceX) May 27, 2020