Kryemadhi: “Dashnori” doli të ishte vetë Meta

Yjet

Gazeta Express

24/04/2026 19:58

Monika Kryemadhi ka ndarë detaje të reja mbi ndarjen e saj nga ish-bashkëshorti Ilir Meta, duke treguar se kriza në marrëdhënie u nxit nga dyshime dhe thashetheme të brendshme.

Në një rrëfim publik, ajo tha se persona nga rrethi i afërt i Metës kishin përhapur pretendime për një lidhje të mundshme jashtëmartesore, duke u bazuar në mesazhe të interpretuara si komprometuese nga telefoni i saj.

Sipas Kryemadhit, situata u përshkallëzua deri në atë pikë sa Meta u largua nga banesa, duke sjellë një ndarje faktike përpara çdo procedure zyrtare.

Ajo sqaroi se e gjithë historia lidhej me biseda të saj me një kontakt të regjistruar në telefon si “zemra ime”, të cilat u përdorën si “provë” për tradhti.

Kulmi i situatës u arrit gjatë një seance gjyqësore me përfaqësues të SPAK, ku sipas saj u konfirmua se numri në fjalë i përkiste vetë Ilir Metës.

“Kur u verifikua, rezultoi se ‘dashnori’ ishte vetë ai,” u shpreh Kryemadhi.

Ajo shtoi se nuk ka reaguar ndaj këtij momenti në sallën e gjyqit dhe theksoi se nuk ka më interes për qëndrimet apo reagimet e ish-bashkëshortit.

Rrëfimi hedh dritë mbi tensionet dhe keqkuptimet që, sipas saj, ndikuan në përfundimin e marrëdhënies. /GazetaExpress/