Juve – Barça, supersfida e Championsit

Gazeta Express

28/10/2020 16:30

Sonte do të zhvillohen ndeshjet e xhiros së dytë në Grupet E, F, G e H në Ligën e Kampionëve

Liga e Kampionëve vazhdon sonte me ndeshjet e xhiros së dytë në Grupet E, F, G e H, shkruan Gazeta Express.

Pa dyshim ndeshja kryesore e natës, por edhe e kësaj xhiroje do të jetë ajo në mes të Juventusit dhe Barcelonës.

Dy gjigantët e futbollit evropian do t’i matin forca në duelin e tyre në Torino, në kuadër të Grupit G.

Të dyja ekipet vijnë nga fitoret në duelet e para përkatëse, shkruan Gazeta Express.

Në Grupin H, Manchester United e kërkon fitoren e dytë sezonale kundër Leipzigut pasi paraprakisht e kishte mundur Paris Saint-Germainin.

Gjiganti francez nga ana e tij do të mundohet t’i fitojë pikët e para sonte në Turqi kundër ekipit Istanbul Basaksehir.

Chelsea po ashtu llogarit në fitore në udhëtimin e tij, ku përballë do të ketë ekipin Krasnodar në Grupin E.

Ndërkaq, Lazio e Vedat Muriqit e Thomas Strakoshës në Grupin F, pas fitores ndaj Borussia Dortmundit, e viziton Club Bruggen.

Gjermanët nga ana e tyre në këtë xhiro do të kenë punë me Zenit St. Petersburgun. /Gazeta Express/