Debati kaotik Trump-Biden, vendim për ndryshim formati: Të mbyllet mikrofoni - Gazeta Express

Lajme

Gazeta Express

01/10/2020 19:04

Debati kaotik Trump-Biden, vendim për ndryshim formati: Të mbyllet mikrofoni

Lajme

Gazeta Express

01/10/2020 19:04

Komisioni i Debateve Presidenciale thotë se do të shtojë “masa të reja” për të ruajtur rregullin” në debatet e ardhshme pas debatit të parë kaotik mes Presidentit Donald Trump dhe rivalit të tij demokrat, Joe Biden.

Një prej masave të reja mund të jetë fikja e mikrofonit nëse kandidatët ndërpresin njëri-tjetrin.

Ndërprerjet e vazhdueshme nga ana e Trump ndërsa fliste kandidati demokrat, përcaktuan tonin e debatit të martën. Biden shpesh nuk arrinte të mbaronte dot fjalinë.

Moderatori Chris Wallace i televizionit Fox News i kërkoi disa herë zotit Trump që të lejonte zBiden të mbaronte, por pa rezultat.

Biden tha në një takim fushate të mërkurën se shpresonte që organizatorët e debateve të ardhshme të mund të mbyllnin mikrofonin e kandidatit që nuk ishte duke folur.

“Ishte një turp kombëtar. Nuk dua të spekuloj se çfarë do të ndodhë në debatin e dytë ose të tretë”, tha ai.

Presidenti Trump reagoi në Twitter duke postuar një lajm për njoftimin e Komisionit të Debateve Presidenciale, shoqëruar me komentin:

“Provoni të merrni një moderator të ri dhe një kandidat më të zgjuar demokrat”.

Ai e kishte kritikuar edhe më herët në Twitter gjatë ditës, moderatorin e debatit, Wallace.

Komisioni i Debateve Presidenciale e falenderoi zotin Wallace “për profesionalizmin dhe aftësitë e tij në debatin e natës së kaluar”.

Ndërkohë fushata e Trump reagoi ndaj njoftimit, duke thënë se Komisioni “nuk duhet të ndryshojë rregullat e lojës në mes” të procesit.

Komisioni jopartiak ka organizuar çdo debat për zgjedhjet presidenciale që nga viti 1988. Në një deklaratë, komisioni tha se debati i parë “e bëri të qartë se duhen bërë ndryshime në strukturën e formatit të debateve të ardhshme, për të garantuar një diskutim më të rregullt të çështjeve”.

Komisioni tha se “synon të sigurojë instrumente shtesë për të ruajtur rregullin për debatet e tjera”.

Komisioni thotë gjithashtu se po “shqyrton me kujdes ndryshimet që do të miratojë dhe do t’i bëjë ato të njohura së shpejti”.