Chelsea në dilemë për Roseniorin, drejtuesit diskutojnë shkarkimin pas serisë negative

Futboll

Gazeta Express

22/04/2026 18:20

Situata te Chelsea po bëhet gjithnjë e më e tensionuar, teksa drejtuesit e klubit janë duke zhvilluar diskutime të brendshme për të ardhmen e trajnerit Liam Rosenior.

Sipas raportimeve të fundit, hierarkia e “Bluve” po shqyrton dy opsione: vazhdimin e bashkëpunimit me teknikun anglez ose shkarkimin e tij, në një moment kritik të sezonit.

Edhe pse deri më tani klubi kishte treguar mbështetje për Roseniorin, rezultatet e fundit kanë vënë gjithçka në pikëpyetje. Chelsea vjen pas një serie prej pesë humbjesh radhazi, pa arritur të shënojë asnjë gol – një statistikë alarmante për një skuadër të këtij niveli.

Këto zhvillime vijnë në prag të ndeshjes së rëndësishme në FA Cup, çka e bën edhe më urgjente marrjen e një vendimi nga drejtuesit e klubit londinez.

Diskutimet pritet të intensifikohen në orët në vijim, ndërsa mbetet për t’u parë nëse Rosenior do të marrë një tjetër mundësi apo do të jetë viktima e radhës e krizës së rezultateve në “Stamford Bridge”.