Britania kundër hetimeve të GjND-së për krime lufte në territoret palestineze

Lajme

Gazeta Express

15/04/2021 11:33

Kryeministri i Britanisë së Madhe, Boris Johnson, përmes një letre dërguar grupit lobues “Miqtë Konservatorë të Izraelit”, ka thënë se ndonëse qeveria e tij ka respekt për pavarësinë e GjND-së, i kundërshton hetimet e kësaj gjykate për krimet e luftës në territoret palestineze.

Përktheu: Nasuf Abdyli

“Ky hetim e jep përshtypjen se është sulm i posaçëm dhe paragjykues ndaj një miku dhe aleati të Mbretërisë së Bashkuar”, thuhet në letrën e shefit të qeverisë britanike.

Ndaj kësaj letre reagoi misioni diplomatik i Palestinës në Britaninë e Madhe. Përmes një deklarate, ky mision tha se letra është kontradiktë për shumë keqardhje në raport me ligjin ndërkombëtar dhe politikat e mëhershme britanike, shkruan The Guardian, transmeton Gazeta Express.

“Ajo shënon një pikë të ulët të raporteve Mbretëri e Bashkuar – Palestinë dhe e minon kredibilitetin e Mbretërisë së Bashkuar në skenën ndërkombëtare. Është e qartë se Britania tani beson se Izraeli është mbi ligjin”, thuhet në reagimin e misionit palestinez.

Hetimet zyrtare rreth krimeve të pretenduara në Bregun e pushtuar Perëndimor, Jerusalemin Lindor dhe në Rripin e Gaza-s filluan muajin e kaluar. Në këto hetime pritet të përfshihen lufta e vitit 2014 në Gaza, përleshjet kufitare në Gaza më 2018 dhe ndërtimi i vendbanimeve izraelite në Bregun Perëndimor.

Këto hetime i vënën në rrezik nga ndjekja penale qindra izraelitë, përfshirë ushtarë dhe figura të larta politike. Kryeministri izraelit, Benjamin Netanyahu, i ka kundërshtuar hetimet e Gjykatës Ndërkombëtare të Drejtësisë, duke i cilësuar ato si “antisemitizëm i pastër dhe kulm i hipokrizisë”.

Sidoqoftë, kryeprokurorja e GjND-së, Fatou Bensouda, ka deklaruar se ka bazë të arsyeshme për t’i zhvilluar këto hetime dhe se me këtë rast synohet të vendoset drejtësia për viktimat e të dyja palëve, izraelitëve dhe palestinezëve.