Bota e modës në zi – Shuhet Cesare Paciotti, mjeshtri italian i luksit dhe ikonë e këpucëve të famshme

Yjet

Gazeta Express

14/10/2025 18:56

Bota e modës ka humbur një nga figurat e saj më të rëndësishme. Stilisti i njohur italian, Cesare Paciotti, është ndarë nga jeta në moshën 67-vjeçare, pas një sëmundjeje që e kishte munduar prej kohësh.

Lajmi i hidhur ka tronditur industrinë e modës dhe qytetin e tij të lindjes, Civitanova Marche (Macerata), ku ai ndërtoi një nga perandoritë më të njohura të këpucëve luksoze “Made in Italy”.

Cesare Paciotti, së bashku me motrën e tij Paola, morën drejtimin e punishtes së familjes në vitet ’80 – një biznes i themeluar nga prindërit Giuseppe dhe Cecilia që prej vitit 1948. Nga një punishte artizanale, ai arriti ta shndërronte markën në një simbol të modës ndërkombëtare, duke mbetur gjithmonë i lidhur me qytetin e tij të origjinës.

Nga Marche në Hollywood dhe Azi – këpucët e Paciottit u bënë sinonim i luksit, finesës dhe stilit. Të punuara me lëkurë të rafinuar dhe detaje të guximshme, ato u veshën nga yjet më të mëdhenj të botës së spektaklit dhe modës: Naomi Campbell, Beyoncé, Paris Hilton, Eva Longoria, Maneskin, Blanco, si dhe ikonat e stilit si Anna Dello Russo.

Identiteti i fortë mes shkëlqimit dhe rokut

Koleksionet e tij u dalluan për dizajnin unik, kombinimin e materialeve si kadifeja, lëkura e lëmuar dhe detajet e çelikut.

 Modeli më i famshëm i firmës, stilettoja e zezë sfiduese, u kthye në emblemën e Paciottit dhe simbol të elegancës dhe guximit. Ky dizajn shoqëroi pasarelat më prestigjioze dhe qilimat e kuq në mbarë botën.

Një trashëgimi e përjetshme në modë

Paciotti jo vetëm që krijoi këpucë, por solli një koncept luksi që i rezistoi kohës pa tradhtuar kurrë kodet e markës.

Përmes kampanjave të fuqishme reklamuese dhe një vizioni artistik të dallueshëm, ai arriti ta vendoste firmën e tij në mesin e liderëve të industrisë së këpucëve italiane.

Lajmi për vdekjen e tij ka sjellë reagime të shumta nga bota e modës, ndërsa qyteti i Civitanova Marche dhe i gjithë rajoni i Marche-s po e vajtojnë humbjen e “gjeniut të dytë” që e bëri zonën qendër të modës botërore.

Data e funeralit ende nuk është bërë e ditur. /GazetaExpress/