Gjiganti evropian po tenton ta ‘rrëmbejë’ Rodrin nga duart e Realit

Futboll

Gazeta Express

04/08/2026 18:42

Real Madridi raportohet se është gjithnjë e më i bindur se do ta transferojë Rodrin gjatë kësaj vere, ndërsa besohet se kapiteni i Spanjës është gati të rikthehet në qytetin ku ka lindur.

Fituesit të Topit të Artë 2024 i ka mbetur edhe një vit kontratë me Manchester Cityn, gjë që ka nxitur interesimin e disa gjigantëve evropianë gjatë kësaj merkatoje, përfshirë Paris Saint-Germainin, Bayern Munichun dhe Real Madridin.

Interesimi për Rodrin nuk është aspak i papritur, pas paraqitjeve të tij të shkëlqyera në Kupën e Botës 2026 në Amerikën e Veriut, ku ai ngriti trofeun me Spanjën, që u shpall kampione e botës për herë të dytë në histori.

Me kalimin e javëve të merkatos, gjithçka tregon se 30-vjeçari dëshiron vetëm një rikthim në La Liga për të veshur fanellën e bardhë të Real Madridit.

Megjithatë, ndërsa marrëveshja duket se po afrohet, një tjetër pretendent është futur në garë.

Sipas raportimeve të “AS Diario”, rivali i përjetshëm i Real Madridit, Barcelona, ka hyrë në garë në përpjekje për ta bindur mesfushorin, katër herë kampion të Premierligës, që të transferohet në “Camp Nou”.

Klubi katalanas ka nevojë për përforcime në mesfushë pas lëndimit afatgjatë të Frenkie de Jongut dhe për këtë arsye ka pyetur Manchester Cityn për mundësinë e arritjes së një marrëveshjeje.

Edhe pse Barcelona është kampionia në fuqi e La Ligës dhe do t’i ofronte Rodrit një sfidë të re interesante, raportimet thonë se dëshira e tij është vetëm një destinacion: “Santiago Bernabeu”.

Sipas të njëjtit burim, drejtuesit e Barcelonës ishin të vetëdijshëm për prioritetin e futbollistit edhe para se të interesoheshin zyrtarisht për të.

Pavarësisht nevojës për ta zëvendësuar De Jongun, Barcelona beson se ka alternativa të mira të dala nga akademia, të cilat mund ta mbulojnë këtë rol, si Marc Bernal dhe Marc Casado.

Ndërkohë, raportohet se prioritetet kryesore të Barcelonës në këtë merkato mbeten rikthimi i Joao Cancelos dhe transferimi i një sulmuesi që do ta zëvendësojë Robert Lewandowskin, i cili u largua nga klubi këtë verë dhe tashmë është pjesë e skuadrës amerikane Chicago Fire./GazetaExpress/