Füllkrug drejt rikthimit në Bundesliga

Futboll

Gazeta Express

26/05/2026 17:59

SV Werder Bremen po shpreson seriozisht në rikthimin e sulmuesit Niclas Füllkrug gjatë afatit kalimtar të verës.

Sipas raportimeve të gazetës gjermane Bild, klubi i Bundesligës ka një “mundësi të madhe” për ta rikthyer 33-vjeçarin, i cili aktualisht është nën kontratë me West Ham United.

Pas përfundimit të huazimit te Milani, Füllkrug do të rikthehet te klubi anglez, me të cilin ka kontratë deri në verën e vitit 2028. Megjithatë, e ardhmja e tij në Londër duket e pasigurt.

West Hami ra nga Premier League këtë sezon dhe pritet të ketë vështirësi financiare, sidomos për të mbuluar pagën vjetore të sulmuesit gjerman, që raportohet të jetë rreth 4.5 milionë euro.

Për më tepër, Füllkrug nuk arriti të përmbushte pritshmëritë gjatë periudhës së tij në Angli, çka ka shtuar mundësinë e largimit të tij këtë verë.

Raportet bëjnë të ditur se “Hammers” mund të pranojnë një shumë modeste transferimi, apo edhe ta lejojnë lojtarin të largohet si futbollist i lirë, nëse arrihet marrëveshje për kompensimin financiar të kontratës së tij.

Nga ana tjetër, Werder Bremen e sheh këtë situatë si një mundësi ideale për rikthimin e sulmuesit në Bundesliga. Klubi kishte tentuar ta transferonte edhe gjatë afatit dimëror, por negociatat kishin dështuar për shkak të kërkesave financiare.

Vetë Füllkrug thuhet se është i hapur për rikthimin në Gjermani, edhe për arsye personale, pasi dëshiron të jetë më afër qytetit të tij të lindjes, Hanoverit.

Edhe pse disa klube nga MLS kanë shfaqur interesim për të, prioriteti i sulmuesit mbetet rikthimi në futbollin gjerman.

Füllkrug ka qenë pjesë e Werder Bremenit nga viti 2008 deri më 2023, me disa periudha huazimi, duke regjistruar 19 gola dhe 16 asistime në 124 ndeshje zyrtare me klubin. /GazetaExpress/