Qerkini dhe Ademi i bashkohen FC Dinamo Ferizaj në prag të ndeshjes së barazhit

Futboll

Gazeta Express

26/05/2026 18:14

FC Dinamo Ferizaj ka njoftuar rikthimin e dy figurave të njohura të klubit, Burim Qerkini dhe Fatos Ademi, në një moment vendimtar të sezonit, përpara ndeshjes së barazhit që zhvillohet të premten.

Dy emrat që prej themelimit të klubit kanë qenë të lidhur ngushtë me Dinamon, rikthehen tashmë në një fazë ku sfida sportive merr rëndësi të veçantë. Edhe kur nuk kanë qenë pjesë zyrtare e strukturave, Qerkini dhe Ademi kanë qëndruar pranë ekipit, duke kontribuar në mënyrë të vazhdueshme në mbështetje dhe zhvillim të klubit.

Rikthimi i tyre vlerësohet si një shtesë e rëndësishme jo vetëm në aspektin organizativ, por edhe në atë motivues, në një ndeshje që përcakton fatin e sezonit për skuadrën nga Ferizaj.

Në deklarimet dhe qëndrimet e klubit, theksohet se kjo sfidë nuk përfaqëson vetëm një ndeshje futbolli, por një moment ku luhet për krenarinë e qytetit dhe vazhdimësinë e historisë së Dinamos.

FC Dinamo Ferizaj hyn në përballjen e së premtes me synimin për të dhënë maksimumin dhe për të qëndruar e bashkuar në një nga ndeshjet më të rëndësishme të sezonit. /GazetaExpress/