Skandali i gjyqtarëve në Serie A, asnjë lojtar e asnjë drejtor i përfshirë

Futboll

Gazeta Express

27/04/2026 17:01

Raportet nga Italia sugjerojnë se asnjë lojtar apo drejtues klubesh nuk është i përfshirë në skandalin e ri të gjyqtarëve në Serie A, pasi të gjithë personat nën hetim janë të lidhur me botën e arbitrimit.

Detaje të reja kanë dalë në pah pas skandalit të fundjavës, me zyrtarët e VAR-it Luigi Nasca, Rodolfo Di Vuolo dhe Daniele Paterna që rezultojnë nën hetim, së bashku me përgjegjësin për caktimin e gjyqtarëve Gianluca Rocchi dhe mbikëqyrësin e VAR-it Andrea Gervasoni.

Sipas mediave italiane, përfshirë “La Gazzetta dello Sport”, edhe persona të tjerë janë regjistruar si të dyshuar nga Prokuroria e Milanos, por të gjithë janë të lidhur me sistemin e gjyqtarëve dhe jo me klubet e Serie A.

“Gazzetta” thekson se deri më tani nuk ka asnjë futbollist apo drejtues klubi nën hetim.

Rocchi dyshohet se ka ndikuar te zyrtarët e VAR-it gjatë ndeshjeve dhe se ka përzgjedhur gjyqtarë që pëlqeheshin nga Inter për disa ndeshje gjatë sezonit 2024-25.

Megjithatë, nuk ka prova që tregojnë se Rocchi ka pasur komunikime direkte me klubin zikaltër për emërimet e gjyqtarëve, dhe asnjë lojtar apo drejtues i Interit nuk është nën hetim.

Nga ana tjetër, një video e datës 1 mars 2025 duket se tregon Paternën duke marrë komunikime nga jashtë dhomës së VAR-it gjatë një ndeshjeje të Serie A mes Udineses dhe Parmas, duke e shtyrë atë të kërkojë që gjyqtari kryesor të rishikojë aksionin në monitorin anësor, pavarësisht hezitimit fillestar./GazetaExpress/