Test i thjeshtë parashikon jetën në 24 orët e fundit

Shneta tjera

Gazeta Express

27/04/2026 19:36

Një test i thjeshtë klinik mund të ndihmojë mjekët të parashikojnë nëse një pacient mund të humbasë jetën brenda 24 orëve, me një saktësi të lartë, sipas një studimi të fundit.

Metoda bazohet në kontrollin e refleksit korneal – reagimi automatik i syrit që shkakton mbylljen e qepallave kur sipërfaqja e syrit preket lehtë. Studiuesit zbuluan se pacientët që e kanë humbur këtë refleks kanë shumë më tepër gjasa të ndërrojnë jetë brenda një dite.

Studimi, i publikuar në revistën BMJ Supportive and Palliative Care dhe i udhëhequr nga Dr Jung Hun Kang nga Koreja e Jugut, thekson se identifikimi i momentit të fundit të jetës mbetet një nga sfidat më të mëdha në kujdesin paliativ.

Në kërkim u përfshinë 112 pacientë me kancer në fazë të avancuar, të cilët kishin një jetëgjatësi të parashikuar prej një deri në dy javësh. Infermierët kontrolluan refleksin korneal disa herë në ditë dhe regjistruan nëse ai ishte normal, i dobësuar apo i munguar.

Rezultatet treguan se pacientët pa refleks korneal kishin mbi pesë herë më shumë gjasa të vdisnin brenda 24 orëve, ndërsa shkalla e vdekshmërisë në këtë grup arriti mbi 70%.

Ekspertët shpjegojnë se humbja e këtij refleksi mund të lidhet me dobësimin e funksionit të trurit, veçanërisht të trungut të trurit, i cili kontrollon funksionet jetike si frymëmarrja dhe ndërgjegjja.

Studiuesit theksojnë se testi është edhe më i dobishëm kur kombinohet me metoda të tjera vlerësimi të gjendjes së pacientit, si shkallët që matin nivelin e vetëdijes dhe qetësimit.

Megjithatë, ekspertët paralajmërojnë se studimi është kryer në një grup relativisht të vogël pacientësh dhe nevojiten kërkime të mëtejshme për ta konfirmuar në një shkallë më të gjerë.

Nëse vërtetohet plotësisht, ky test mund të shndërrohet në një mjet të rëndësishëm për mjekët, duke ndihmuar familjarët të përgatiten dhe duke mundësuar një kujdes më të qetë dhe dinjitoz në momentet e fundit të jetës. /GazetaExpress/