Mbappe në telashe, frikë se mund ta humbasë Botërorin

Futboll

Gazeta Express

04/03/2026 10:44

Real Madridi po përballet me një tjetër problem të madh pas dëmtimit serioz të Rodrygos, i cili e ka këputur ligamentin e kryqëzuar anterior dhe meniskun e jashtëm në gju të djathtë, duke e lënë repartin mjekësor të klubit në limitet e tij.

Gjatë gjithë kohës, situata rreth Kylian Mbappés vazhdon të jetë temë diskutimi: ai është jashtë prej disa javësh për shkak të një problemi në gju të majtë, dhe natyra e saktë e dëmtimit nuk ishte e qartë deri para pak ditësh.

Të hënën, Real Madridi njoftoi zyrtarisht se bëhet fjalë për një shtrembërim në gju të majtë, për të cilin ai po merr trajtim konstant nën mbikëqyrjen e mjekëve të klubit.

Megjithatë, kohëzgjatja e rikuperimit është bërë pikë diskutimi.

Sipas mediumit spanjoll “Cadena SER”, klubi spanjoll po mundohet ta rikthejë lojtarin brenda tri javësh, pikërisht në kohë për ndeshjen e kthimit në Ligën e Kampionëve kundër Manchester Cityt, përcjell “Gazeta Express”.

Por rrethi i Mbappés mendon se dëmtimi është më serioz dhe se nxitimi për t’u kthyer në fushë mund ta komprometojë përgatitjen për Kupën e Botës, e cila fillon në më pak se 100 ditë.

Ata thonë se ligamenti i kryqëzuar posterior në gju është i prekur dhe që Mbappé nuk mund të rrezikojë — çdo ditë që kalon është thelbësore që ai të jetë gati për Botëror.

Mbappé vetë nuk dëshiron të rrezikojë dhe po përqendrohet në shërimin e plotë, ndërsa debati me klubin vazhdon.

Mbajtja e tij e shëndoshë për Kupën e Botës është prioriteti kryesor për francezin, por Real Madridi dëshiron ta ketë gati edhe për sfidën e Champions League. /Gazeta Express