Luajti i lënduar me ACL të këputur, Rodrygo do të mbetet jashtë fushavë për 10 muaj

Futboll

Gazeta Express

03/03/2026 21:08

Real Madridi duket se po kalon nga një lajm i keq te tjetri, dhe pasojat e dëmtimit të Rodrygo Goes po duken po aq të rënda.

Sulmuesi brazilian do të mungojë për pjesën e mbetur të këtij sezoni dhe për Kupën e Botës, dhe rikthimi i tij duket një rrugë e gjatë dhe e vështirë.

“Los Blancos” humbën 1-0 ndaj Getafe të hënën në mbrëmje dhe u fishkëlluan në fund të të dy pjesëve, me disa tifozë që kërkonin dorëheqjen e presidentit Florentino Perez.

Trajneri Alvaro Arbeloa po përballet me kritika në rritje për vendin e tij, por ka insistuar se garën për titull kundër Barcelona ende nuk e ka humbur, pavarësisht diferencës prej katër pikësh.

Më keq akoma, u zbulua se Rodrygo pësoi një dëmtim të ligamentit të kryqit të përparmë gjatë ndeshjes.

25-vjeçari po kthehej nga një dëmtim i tendinit, pasi kishte humbur pesë ndeshje për shkak të tij.

Arbeloa e futi në fushë në minutën e 55-të për të kërkuar barazimin pas golit të fuqishëm të Martin Satriano, por sipas “Diario AS”, dëmtimi i Rodrygos ndodhi vetëm 10 minuta më vonë.

Në minutën e 66-të, ai mori topin në vijën anësore dhe po nisej në sprint, por ra me dhimbje.

Pas disa sekondash në tokë, Rodrygo u ngrit dhe vazhdoi, por nuk dihet nëse në atë moment kishte një çarje të pjesshme dhe e përkeqësoi situatën, apo dëmtimi u shkaktua plotësisht në atë moment.

Ekzaminimet e mëtejshme zbuluan se përveç çarjes së plotë të ACL-së, Rodrygo ka dëmtuar edhe meniskun.

Si rezultat, koha e parashikuar e mungesës prej 7-9 muajsh mund të shkojë deri në një vit, me 10 muaj që duket të jenë skenari minimal i rikuperimit.

Koha shtesë e mungesës do të ndikojë jo vetëm tek mundësitë e Rodrygos për të rikuperuar formën e plotë për sezonin e ardhshëm, por edhe në planifikimin e skuadrës së Real Madrid.

Nëse ai nuk rikthehet deri në mars të vitit të ardhshëm, në këtë fazë të sezonit zakonisht është e vështirë të ndërtohet forma fizike për shkak të rëndësisë së ndeshjeve.

“Los Blancos” mund të planifikojnë gjithashtu sezonin pa Rodrygon, duke parë çdo kontribut cilësor nga ai si një bonus./GazetaExpress/