Sassuolo i publikon pritjet “abnormale” të Aro Muricit

Futboll

Gazeta Express

03/03/2026 16:40

Arijanet Muric po tregon paraqitje të mëdha me Sassuolon këtë edicion në Serie A.

Ylli i kombëtares së Kosovës në ndeshjen e fundit me Atalantën u zgjodh më i miri në fushë, sipas “Sofascore”.

Nga kjo platformë që është e specializuar në vlerësimin e futbollistëve në fushën e lojës, e ka vlerësuar Muricin me notën 9.5 në ndeshjen e xhiros që lamë pas ndaj Atalantës.

Portieri dardan njëmend pati një performancë për t’u mbajtur mend, pasi bëri gjashtë pritje në atë përballje.

Nga gjashtë pritjet që ai u përballë, pesë ishin prej brenda zonës.

E, kjo paraqitje e yllit dardan i la të kënaqur edhe klubin e tij, Sassuolon.

Faqja zyrtare e klubit ka bërë një postim të veçantë në nder të tij, duke bërë një mbishkrim të veçantë.

VIDEON MUND TA SHIHNI KËTU

Në video shihen pritjet e Muricit ndaj Atalantës, që përcillen me mbishkrimin: “Nuk e di se çka është normale më”.

Murici kaloi te Sassuolo gjatë verës, në formë huazimi nga Ipswich Town.

Mirëpo, pas përfundimit të huazimit në qershor, raportohet se klubi italian ka mundësinë e blerjes së Muricit për shumën e 10 milionë eurove.

Murici u rrit në akademinë e Manchester Cityt, mirëpo ka bërë disa lëvizje të ndryshme në formë huazimi në karrierën e tij, duke nisur nga NAC Breda, Nottingham Forest, Girona, Willem II, Adana Demirspor, derisa kaloi në lëvizje të përhershme te Burnley në vitin 2022 për 3 milionë euro.

Në vitin 2024 ai kaloi tek Ipswich për 9.55 milionë euro.

Ndërkohë, që nga debutimi i tij me Kosovën në vitin 2018, ai ka luajtur në total 48 ndeshje me kombëtaren dardane./GazetaExpress/