Laporta favorit, por rivalët mund të bashkohen dhe ta mbështesin rivalin Font

Futboll

Gazeta Express

02/03/2026 15:51

Në prag të zgjedhjeve presidenciale te Barcelona, Joan Laporta duket si kandidati më i favorizuar për t’u rizgjedhur, por rivalët e tij po e shqyrtojnë mundësinë e një bashkimi të forcave për ta sfiduar atë.

Sipas informacioneve nga kampi opozitar, disa prej pretendentëve po e vlerësojnë idenë e një liste të përbashkët për të bërë garë reale kundër Laportës më 15 mars, shkruajnë mediat spanjolle, përcjell “Gazeta Express”.

Laporta është lider i sondazheve dhe mbetet figura kryesore në garë, por pretendentë si Víctor Font, Xavier Vilajoana dhe Marc Ciria janë duke provuar ta gjejnë një strategji të përbashkët për t’i rritur shanset e opozitës, sidomos përballë dominimit të Laportës në sondazhe dhe mbështetjes së tij të fortë brenda klubit.

Rivendosja e një liste të bashkuar vjen në një moment kur pretendentët rivalë përballen me sfidën e mbledhjes së 2,337 nënshkrimeve të nevojshme për t’u bërë kandidatë zyrtarë në zgjedhje – një proces që pritet të përfundojë brenda ditëve në vijim.

Disa prej tyre, veçanërisht Vilajoana dhe Ciria, kanë hasur vështirësi në sigurimin e numrit të nënshkrimeve, duke e përforcuar idenë e një koalicioni me Font si një alternativë strategjike për të rivalizuar me Laportën.

Kjo lëvizje potenciale e opozitës tregon se gara elektorale mund ta marrë një drejtim më të fortë dhe më konkurrues sesa pritej, duke e krijuar një skenar të ri përballë një Laporte që pretendon ta vazhdojë mandatin e tij në krye të klubit katalanas. /Gazeta Express