Lautaro e humb derbin ndaj Milanit, ja sa pritet të mungojë shkaku i lëndimit

Futboll

Gazeta Express

20/02/2026 18:43

Lautaro Martínez ka pësuar një tërheqje muskulore në soleusin e këmbës së majtë, dëmtim që pritet ta mbajë kapitenin e Inter jashtë fushave për rreth një muaj dhe ta lërë jashtë derbit kundër Milanit.

Inter publikoi një njoftim zyrtar të premten pas testeve mjekësore të kryera në mëngjes.

Sulmuesi argjentinas kishte pësuar një dëmtim në pulpë gjatë ndeshjes së Ligës së Kampionëve kundër Bodø/Glimt dhe u zëvendësua në pjesën e dytë.

Klubi njoftoi se ekzaminimet zbuluan një “tërheqje muskulore në soleusin e këmbës së majtë” dhe se gjendja e lojtarit “do të rivlerësohet javën e ardhshme”.

Sipas “Sky Sport” dhe “Corriere dello Sport”, Lautaro do të qëndrojë jashtë për tre deri në katër javë. Kjo do të thotë se ai pritet ta humbasë derbin kundër Milanit në fundjavën e 8 marsit.

Megjithatë, Gazzetta dello Sport raporton se Inter shpreson që golashënuesi më i mirë i skuadrës këtë sezon të rikthehet në kohë për derbin, duke munguar në katër ndeshjet e ardhshme: kundër Lecce dhe Genoa në Serie A, kundër Bodø/Glimt në Ligën e Kampionëve dhe përballjen me Como në Kupën e Italisë.

Këtë sezon, Lautaro Martínez ka shënuar 18 gola dhe ka dhënë katër asistime në 35 paraqitje në të gjitha kompeticionet./GazetaExpress/