Parisi udhëton për në Barcelonë pa katër yjet e tij

Futboll

Gazeta Express

30/09/2025 18:20

Finalja që nuk u zhvillua kurrë, por që është përfolur gjatë në Spanjë mes Barcelonës dhe Paris Saint-Germain, do të luhet të mërkurën mbrëma në “Estadi Olímpic Lluís Companys” në Montjuic.

Blaugranat ishin vetëm pak minuta larg finales së Ligës së Kampionëve sezonin e kaluar, e cila do t’i kishte vënë përballë PSG-së.

Megjithatë, shkëlqimi i kësaj përballjeje është zbehur disi për shkak të mungesave të shumta.

Barcelona mbetet në dilemë për gjendjen fizike të Alejandro Balde, ndërsa do të jetë pa Raphinha, Fermín López dhe Joan Garcia.

Nga ana tjetër, dihej se fituesi i “Topit të Artë” Ousmane Dembélé nuk do të përballej me rivalin e tij Lamine Yamal (nënkampion i çmimit), pasi pësoi një dëmtim në muskul të pasëm në fillim të muajit.

Edhe Désiré Doué nuk është rikuperuar nga lëndimi që mori me kombëtaren e Francës, duke kufizuar zgjedhjet e Luis Enriques.

Situata është rënduar edhe më shumë me dëmtimin e Khvicha Kvaratskhelias, që do të mungojë gjithashtu, duke e lënë PSG-në pa të gjithë treshen e tyre titullare të sulmit nga finalja.

Kapiteni Marquinhos do të mungojë po ashtu, pasi ende nuk është rikuperuar plotësisht nga një dëmtim i javës së kaluar.

Në mesfushë, megjithatë, situata është më pozitive.

Fabian Ruiz dhe Joao Neves nuk u përfshinë kundër Auxerre të premten si masë paraprake, por kanë udhëtuar me kampionët e Francës.

Vitinha, i cili u tërhoq në pjesën e parë për shkak të shqetësimeve muskulore, gjithashtu është shpallur i gatshëm.

Edhe pa tre yjet kryesorë, Enrique pritet të hedhë në fushë një repart sulmues kompetitiv: Gonçalo Ramos është favorit për të luajtur në qendër, Bradley Barcola shihet si alternativë e fortë në krah, ndërsa Lee Kang-In është opsioni më me përvojë për të plotësuar treshen ofensive./GazetaExpress/