FDA: Vonesat modeste mes dozave të vaksinës për Covid nuk ulin mbrojtjen ndaj virusit

Shqiperi

Gazeta Express

24/01/2021 10:04

Administrata Amerikane e Ushqimit dhe Barnave të shtunën njoftoi se “Vonesat modeste” mes dozës së parë dhe asaj të dytë të vaksinës për Covid-19 nuk pritet të ulin mbrojtjen ndaj virusit.

Ndërkohë më herët, agjencia kishte paralajmëruar se ndryshimet në oraret e vaksinave pa të dhëna të përshtatshme mund të vinin në rrezik shëndetin publik, raporton CNN.

Qendrat Amerikane për Kontrollin dhe Parandalimin e Sëmundjeve këtë javë azhornuan udhëzimet e tyre duke këshilluar që dozat e dyta të vaksinave mund të planifikohen deri në gjashtë javë pas dozave fillestare, nëse është e nevojshme.

Por CDC njoftoi se dozat e dyta duhet të administrohen sa më afër intervalit të rekomanduar, tre javë pas dozës së parë për vaksinën Pfizer / BioNTech dhe katër javë pas dozës së parë për vaksinën Moderna.

Në deklaratën e lëshuar të shtunën, FDA “pranon që imunizimi i plotë i sa më shumë njerëzve në të gjithë vendin do të ndihmojë në kufizimin e përhapjes së virusit që shkakton Covid-19 dhe duhet të jetë përparësi”.

“Vonesat modeste në administrimin e dozës së dytë, nëse është absolutisht e nevojshme, nuk pritet të zvogëlojnë mbrojtjen e dhënë nga doza e dytë dhe janë të preferueshme për të mos përfunduar serinë e 2 dozave,” thuhet më tej.

Testet klinike treguan se të dyja vaksinat Pfizer dhe Moderna janë rreth 95% efektive, kur përdoren në përputhje me dozat e rekomanduara dhe intervalet e dozimit.

FDA vuri në dukje se nuk ka vlerësuar të dhëna në lidhje me mbrojtjen e siguruar nga vaksinat nëse ka vonesa më të mëdha në administrimin e dozës së dytë.