Xavi Hernandez është ankuar prapë mbrëmë në referim pas El Clasicos, të cilën Barcelona e humbi me rezultat 2:3 nga Real Madridi.
Ndërkohë, trajneri katalunas u pyet në konferencë për shtyp edhe për vendimin e tij për t’u larguar në fund të sezonit dhe qëndrimin eventual në “Camp Nou”, shkruan “Gazeta Express”.
“Nuk është momenti të flas për këtë punë. Më duhet të mendoj për ndeshjen e ardhshme. Mungojnë edhe gjashtë ndeshje dhe mund të ndodhin shumë gjëra”, deklaroi fillimisht legjenda e Barcelonës.
Ndërkohë, Xavi tha se ekipi i tij ishte më i mirë në ndeshjen e mbrëmshme në “Santiago Bernabeu”, ndërsa u pyet nëse Reali e meriton titullin e kampionit në La Liga në këtë edicion.
“Më duhet t’i uroj ata. E kanë humbur vetëm një ndeshje, një sezon i jashtëzakonshëm. Por, sensacioni im është se në këtë ndeshje kishte padrejtësi maksimale”, u shpreh tutje trajneri i Barcelonës, e cila ka mbetur 11 pikë prapa “Los Blancos”, me shumë pak gjasa për ta mbrojtur titullin e kampionit të Spanjës. /Gazeta Express/