Trump tha se do t’ia japë licencën Ukrainës për raketat Patriot, Reuters: Mund të prodhohen në Gjermani për të shmangur sulmet ruse

Lajme

Gazeta Express

09/07/2026 11:17

Presidenti amerikan, Donald Trump, deklaroi të mërkurën se SHBA-ja do t’i japë Ukrainës një licencë për prodhimin e interceptorëve të raketave Patriot, një zhvillim që përbën një shtysë të madhe për Kievin, i cili prej kohësh ka kërkuar leje për të prodhuar këto armë mbrojtëse.

“Do t’ju japim një licencë për të prodhuar Patriot. Kjo është mjaft e bukur. Kështu nuk mund të ankoheni se nuk po ju japim mjaftueshëm”, tha Trump gjatë një takimi me presidentin ukrainas, Volodymyr Zelenskyy, në samitin e NATO-s në Ankara.

“Është një armë mbrojtëse, dhe këtë e pëlqej më shumë sesa një armë sulmuese”, shtoi ai.

Trump nuk dha hollësi mbi planin, por toni i takimit ishte një ndryshim i dukshëm nga kritikat e tij të mëparshme ndaj Zelenskyyt, të cilin më parë e kishte quajtur “mosmirënjohës”.

Të mërkurën, Trump tha se ai dhe Zelenskyy kishin krijuar një marrëdhënie “shumë të mirë” dhe se si Moska ashtu edhe Kievi dëshironin t’i jepnin fund luftës që nisi me pushtimin rus të Ukrainës në shkurt të vitit 2022.

Ai shtoi se më vonë gjatë ditës do të zhvillonte një bisedë me presidentin rus, Vladimir Putin.

“Kemi zgjidhur shumë luftëra dhe kjo ishte ajo që mendova se ndoshta do të ishte më e lehta, por Putini është një karakter i vështirë, dhe edhe ky është një karakter i vështirë”, tha Trump, duke iu referuar Zelenskyyt, i cili ishte ulur pranë tij.

Nga ana e tij, Zelenskyy i tha Trumpit: “Jam i sigurt se do të bëni gjithçka për ta ndalur këtë luftë”.

Ndërkohë, Ministria e Jashtme e Rusisë dënoi vendimet e NATO-s të marra në samitin në Turqi, pasi aleanca njoftoi ndihmë të re ushtarake për Ukrainën, duke paralajmëruar se ato mund të kenë pasoja katastrofike.

Nuk ishte menjëherë e qartë nëse ndonjë interceptor do t’i dërgohej Ukrainës në afat të shkurtër. Dy burime të njohura me diskutimet thanë për Reuters se interceptorët e rinj ka të ngjarë të prodhohen në Gjermani ose në një vend tjetër europian, për të shmangur rrezikun që objektet e prodhimit në Ukrainë të bëhen shënjestër e sulmeve ruse.

“T’i japësh Ukrainës një licencë për të prodhuar Patriot do të ishte një zhvillim i madh, nëse ndodh”, shkroi në platformën X ish-ambasadori amerikan në Rusi, Michael McFaul. “Por Ukrainës i duhen interceptorët për mbrojtje ajrore tani dhe nuk mund të presë derisa të prodhohen në të ardhmen”.

I pyetur nëse SHBA-ja do të dërgojë menjëherë interceptorë shtesë Patriot, Trump u përgjigj se “disa” mund të dërgohen menjëherë dhe se beson se Ukraina mund të nisë shpejt prodhimin e tyre.

“Ne kemi Patriot, por nuk kemi aq shumë. Na duhen edhe për veten tonë”, tha ai.

“Mendoj se ata mund t’i prodhojnë mjaft shpejt. Pasi t’ua shpjegojmë procesin, do ta sjellim kompaninë këtu. Ju do të bashkëpunoni me kompaninë. Ata kanë aftësi të mëdha për të prodhuar armë, madje edhe armë shumë komplekse|.

Zelenskyy ka kërkuar vazhdimisht interceptorët amerikanë Patriot, të vetmet armë në arsenalin e Ukrainës që mund të rrëzojnë raketa balistike, të cilat janë jashtëzakonisht të vështira për t’u ndalur për shkak të shpejtësisë së lartë dhe trajektores së tyre.

Trump tha gjithashtu se mund të ushtrohet presion ndaj kompanive për të rritur prodhimin e raketave Patriot.

Lockheed Martin është kontraktori kryesor për prodhimin e interceptorëve të sistemit Patriot, i cili është zhvilluar nga kompania tjetër amerikane e mbrojtjes Raytheon dhe është në përdorim që nga vitet 1980. Të dyja kompanitë bashkëpunojnë edhe me prodhuesin europian të raketave MBDA.