Taravari me apel për Komisionin e Sëmundjeve Ngjitëse: Qëndroni larg politikës

Gazeta Express

01/06/2020 17:20

Anëtarët e Komisionit për Sëmundje Ngjitëse të ndryshohen të gjithë. Kjo kërkesë vjen nga kryetari i Komunës së Gostivarit Arben Taravari, sipas të cilit ky komision ka rënë në grackën e politikës dhe është larguar nga profesionalizimi.

Ai tha se komisioni nuk duhej të lejonte shfuqizimin e menjëhershëm të masave restriktive, pasi ka qenë ende herët, të cilën gjë e argumenton me rritjen e numrit të të infektuarve të rinj me Covid 19 në vendin tonë. Ky presion, sipas tij, ka ardhur pasi pushteti dëshiron mbajtjen e zgjedhjeve sa më parë.

Duke bërë krahasim me vendet e rajonit, Taravari tha se vendi ynë ka numrin më të lartë të vdekjeve nga virusi i ri. Sipas tij, kjo ka ardhur për shkak të diagnostikimit të vonshëm të rasteve.

Ai u bëri thirrje Ministrisë së shëndetësisë dhe asaj për punë të brendshme të fillojnë me fushatë të menjëhershme sensibilizuese të qytetarëve dhe të ketë sanksionim pa dallime për ata që nuk i respektojnë masat dhe protokollet.

Nëse nuk merren me kohë masat e duhura, Taravari thotë se kjo do të ndikojë edhe më shumë jo vetëm në shëndetin e qytetarëve por edhe mbi ekonominë e brishtë të vendit tonë, ku për pasojë edhe mërgimtarët të cilët e gjallërojnë ekonominë tonë, nuk do të mund të vijnë verës për pushime në vendlindje./GazetaExpress/