Rruga Prishtinë-Podujevë, Hysen Durmishi ftohet për intervistim nga Prokuroria Speciale

Lajme

Gazeta Express

30/04/2024 14:29

Zv.ministri i Infrastrukturës Hysen Durmishi ka njoftuar se është ftuar nga Prokuroria Speciale e Kosovës për intervistë me datën 8 maj.

Ai ka treguar se ftesa ka të bëjë me nënshkrimin e kontratave për rrugën Prishtinë-Podujevë. Durmishi në njoftimin e publikuar në profilin e tij në ‘facebook’, ka thënë se kur e ka pranuar ftesën ka menduar se është për lëndën e dorëzuar në Prokurori para tre vitesh.

Sipas Durmishit, është e pakuptimtë ftesa për intervistim për një zv.ministër “bazuar në spekulimet” e një operatori ekonomik dhe pas vendimit të OSHP-së, që Durmishi thotë i jep të drejtë ministrisë.

Njoftimi i plotë:

 Të nderuar qytetarë,

Dëshiroj të ju njoftoj se kam pranuar një ftesë nga prokuroria speciale për intervistë me datën 8 maj. Kur e mora ftesën mendova që më në fund po më ftojnë për të më pyetur për lëndën që e pata dorzuar në prokurori speciale para gati tri viteve. Por jo, ata më kishin ftuar për nënshkrimin e kontratave për rrugën Prishtinë – Podujevë. Me gjasë dikujt po i pengon dinamika e punimeve në këtë projekt sepse gjithçka po ecën sipas planit.

Të ftosh zv.ministrin për intervistim duke u bazuar në spekulimet e një operatori ekonomik, edhe pas vendimit të OSHP- së që na jep të drejtë neve si autoritet kontraktues, më duket sinqerisht e pakuptimtë. Ankesa e atij operatori ekonomik është shpallur e pabazuar edhe me vendim.

Sa e sa raste kam dërguar në prokurori speciale, prokurori themelore e polici të krimeve ekonomike dhe asnjë deri më tash nuk po trajtohet, përkundrazi zvarriten me vite e vite edhe pse ka fakte sa të duash për krim e korrupsion. Rasti i mirëmbajtjes së urave p.sh ku nga 500 mijë euro të planifikuara në fund kontrata përfundon në 5 milionë e 300 mijë euro. Nuk e di çfarë fakti tjetër i duhet prokurorit për të vepruar!

Unë me datë 8 maj do të shkoj në Prokurori Speciale për të ju treguar që jam i lumtur që jam nënshkrues i kontratave për rrugën Prishtinë – Podujevë.  Do të doja që edhe projektet tjera të ecnin me dinamikën e punëve që po bëhen në këtë rrugë. Do të vazhdoj që t’a kryej punën time me nder e përkushtim pavarësisht pengesave që na dalin gjatë rrugës.