Rritja e frikshme e rasteve të reja/ Brataj: Do ketë shtrëngime masash, çfarë do ndodhë me karatinën

Gazeta Express

13/08/2020 14:49

Nisur nga rritja e rasteve të reja me Covid, Shefi i Urgjencës Kombëtare, Skënder Brataj tregon se po shikohet mundësia për shtrëngim të masave. Gjatë intervistës së dhënë për Report Tv, shefi i Urgjencës vuri theksin se njerëzit duhet të ndërgjegjësohen. Brataj deklaroi se po mendohet për disa kufizime, por nuk do të ketë mbyllje të plotë dhe karantinë të detyruar.

“Nuk flitet për mbyllje e kemi thënë disa herë, nuk flitet për karantinë. Ndërsa shtrëngim masash mund të ketë ose të pjesshme ose të detyrueshme për sa i përket formave të tjera të kufizimit të shpërndarjes së infeksionit. Njerëzit duhet sa më shumë të ndërgjegjësohen që të bëjnë atë që varet nga vetë ata.

Nëqoftëse nuk ka më shtretër, aparature, burime njerëzore, detyrimisht që do të ketë masa shtrënguese. Është në dorën e qytetarëve, ata duhet të ndërgjegjësohen. Aty ku vatra është e madhe mund të ketë mbyllje të një vatre, të një biznesi që ka një numër të madh të infektuarish. Kur flasim për mbyllje nuk flasim për mbyllje të pa kontrolluar, për dy deri në tre javë”, tha Brataj.