Rekord i rasteve të reja të koronavirusit në Korenë Jugore

Gazeta Express

29/02/2020 8:17

Koreja Jugore e ka regjistruar numrin më të madh të infektimeve të reja me koronavirus brenda një dite me 594 persona të infektuar.

Kjo rritje e çon në 2931 numrin e përgjithshëm të rasteve të konfirmuara të koronavirusit në shtetin e largët aziatik. Këto shifra u dhanë nga Qendra për Kontrollimin dhe Parandalimin e Sëmundjeve e Koresë Jugore.

Ndryshe, shtatë persona kanë vdekur nga virusi i ri në këtë shtet deri më tani.

Shumica e rasteve të reja të koronavirusit Covid-19 u konfirmuan në qytetin Daegu, që shtrihet në pjesën juglindore të vendit dhe që ka qenë epiqendër e virusit.

Në mbarë botën, deri tash janë infektuar më shumë se 83 mijë persona, shumica në Kinë, ku 2791 njerëz kanë vdekur, shkruan “BBC”, transmeton Gazeta Express.

Rastet e para të koronavirusit së fundi u konfirmuan edhe në Bjellorusi, Lituani, Holandë, Zelandë të Re dhe Nigeri. Shumë shtete kanë vendosur masa të rrepta të kontrollit dhe kufizime të konsiderueshme në sektorin e udhëtimeve.

Kryetari i Organizatës Botërore të Shëndetësisë, Tedros Adhanom, tha se frika dhe keqinformimi janë dy ndër sfidat më të mëdha që po ndikojnë për të keq në luftën kundër koronavirusit.