Policia në Vancouver e refuzon kërkesën e FIFA-s për trajtim të veçantë për Infantinon

Futboll

Gazeta Express

28/04/2026 21:00

Policia në Vancouver ka refuzuar një kërkesë të FIFA-s për t’i ofruar presidentit Gianni Infantinos një eskortë të nivelit të katërt – një masë sigurie që zakonisht rezervohet për figura si Papa.

Sipas raportimeve nga mediat kanadeze, FIFA kishte kërkuar që Infantino të shoqërohej me një autokolonë të plotë nëpër qytet gjatë kongresit vjetor të organizatës, duke i lejuar kalimin në semaforë dhe bllokimin e rrugëve në qendër të qytetit.

Ky nivel sigurie është vetëm një shkallë më poshtë se ai i Papës dhe në të njëjtin nivel me atë të presidentit të SHBA-së, madje më i lartë se ai që i ofrohet kryeministrit të Kanadasë, Mark Carney.

Autoritetet e qytetit të Vancouverit deklaruan se çdo masë transporti dhe sigurie do të jetë “e përshtatshme dhe në përputhje me mënyrën se si qyteti pret ngjarje të mëdha ndërkombëtare”.

Raportohet gjithashtu se Infantino ka ndërtuar marrëdhënie të afërta me presidentin e SHBA-së, Donald Trump, sidomos në prag të Botërorit 2026, madje duke marrë pjesë edhe në inaugurimin e tij të dytë.

Kjo nuk është hera e parë që FIFA kërkon masa të tilla.

Një kërkesë e ngjashme për eskortë u refuzua edhe nga autoritetet në Zelandën e Re gjatë Kupës së Botës për Femra 2023.

Ndërkohë, kongresi vjetor i FIFA-s në Vancouver nis këtë javë, mes kritikave nga Federata e Futbollit të Norvegjisë dhe presidentja e saj Lise Klaveness, e cila ka kundërshtuar dhënien e një “çmimi paqeje” nga FIFA për Trump para shortit të Kupës së Botës së kaluar.

Klaveness ka kërkuar heqjen e këtij çmimi, duke theksuar se nuk është në mandatin e FIFA-s të japë çmime të tilla dhe se kjo është një detyrë që i takon institucioneve si Instituti i Nobelit./GazetaExpress/