Neuer e mbyll me shije të hidhur Botërorin: Rekord negativ në eliminimin e Gjermanisë

Futboll

Gazeta Express

30/06/2026 10:39

Manuel Neuer i ka dhënë fund karrierës së tij ndërkombëtare me një rekord që do të donte ta harronte, pasi barazoi rekordin për numrin më të madh të ndeshjeve radhazi në Kupën e Botës pa arritur të mbajë portën e paprekur.

Portieri legjendar i Gjermanisë e mbylli aventurën e tij me kombëtaren pas eliminimit të papritur nga Paraguai në fazën e 1/16-ave të Kupës së Botës 2026.

Rekord i padëshiruar

Goli i Julio Encisos në minutën e 42-të bëri që Neuer të regjistronte ndeshjen e dhjetë radhazi në Kupën e Botës ku pëson të paktën një gol.

Me këtë statistikë, ai barazoi rekordin negativ të portierit meksikan Antonio Carbajal, i cili gjithashtu pësoi gol në dhjetë ndeshje radhazi në Botëror mes viteve 1950 dhe 1962.

Pas tyre renditen Thomas Ravelli i Suedisë me nëntë ndeshje dhe Jorge Campos i Meksikës me tetë.

Mbrojtja, problemi kryesor i Gjermanisë

Që nga finalja e fituar ndaj Argjentinës në vitin 2014, Gjermania ka pësuar gol në çdo ndeshje të Kupës së Botës.

Në Botërorin 2018 rrjeta e Neuer u tund nga Meksika, Suedia dhe Koreja e Jugut, duke sjellë eliminimin që në fazën e grupeve.

Edhe në Katar 2022, Gjermania pësoi gola ndaj Japonisë, Spanjës dhe Kosta Rikës, duke u eliminuar sërish herët.

Në Botërorin 2026, edhe pse kaloi grupin, skuadra pësoi gola ndaj Curaçaos, Bregut të Fildishtë, Ekuadorit dhe Paraguait, duke konfirmuar problemet e vazhdueshme në repartin defensiv.

Fundi i një epoke

Përfshirja e Neuer në këtë Botëror kishte shkaktuar debat në Gjermani, pasi 40-vjeçari ishte rikthyer nga pensionimi ndërkombëtar me vendim të Julian Nagelsmann.

Me 124 paraqitje për kombëtaren, ai mbetet një nga portierët më të mëdhenj në historinë e futbollit gjerman, por e mbyll karrierën ndërkombëtare me shijen e hidhur të një eliminimi të hershëm dhe një rekord negativ.

Ndërkohë, Gjermania pritet të nisë një proces rindërtimi për Botërorin 2030, me emra si Jamal Musiala, Florian Wirtz dhe Lennart Karl që pritet të jenë shtylla të brezit të ri, ndërsa mbrojtja mbetet një nga problemet më të mëdha për t’u zgjidhur. /GazetaExpress/