Ndalohen dy kontrabandistë në RMV, janë gjetur emigrantë nga Kina

Ballina

Gazeta Express

30/04/2024 11:54

Pas masave dhe veprimeve të ndërmarra, me datë 29.04.2024 në ora 17:40 dhe në ora 18:20, zyrtarët policorë të Stacionit Policor të Vëzhgimit Kufitar në Qendrën Rajonale për Çështje Kufitare Veri, kanë privuar nga liria D.M (26) nga Gjevgjelia, me vendbanim në Bogdanci dhe V.A. (28) nga Pakistani, pasi dyshohet se kanë kryer veprën penale “kontrabandim me migrantë”.

Më parë, V.A. është vërejtur duke marrë gjashtë emigrantë nga Kina nga linja hekurudhore në afërsi të fshatit Tabanovcë të Kumanovës dhe duke i përcjellë në autostradën “Miqësia” afër fshatit Tabanovcë, pas së cilës është larguar. Menjëherë në vendngjarje ka mbërritur D.M. me veturë pasagjerësh “BMW” me targa të Shkupit, në të cilën i ka vendosur mërgimtarët dhe është nisur në drejtim të Kumanovës.

Pas marrjes së masave mjeti është ndalur dhe më pas D.M. i është hequr liria, automjeti i është konfiskuar dhe mërgimtarët janë vendosur në një qendër pritjeje. Gjithashtu, pas masave të marra, V.A. është gjetur dhe privuar nga liria.